Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 GEORGIA | 1998-2006

Era Nanuma na Dauveibuli

Era Nanuma na Dauveibuli

Levu era talanoataki ena vica na ulutaga sa oti era ‘nanuma na Dauveibuli Cecere ena nodra gauna vakaitabagone.’ (Dauv. 12:1) Era le 3,197 na painia e Georgia, qai duanaikatolu ni iwiliwili qori era yabaki 25 lako sobu. Na cava era toso vinaka kina vakayalo na itabagone e Georgia?

Dua na ka e laurai ni veivuke ena nodra toso na itabagone na nodra dau veivolekati na vuvale e Georgia. E kaya o Konstantine, a susugi ratou na lima na luvena ena dina: “A vakayarayarataki au mai na ka dina na nona veikaroni vakayalololoma o Jiova me vaka e dua na tama. Gauna au vakavuvale  kina, au dau saga me ratou doudou tale ga ni torovi au na luvequ.”

Dua tale na tama o Malkhazi e tolu na luvena, rau dau qai saga vakaveiwatini me ratou veivolekati tiko ga vakavuvale. E kaya o Malkhazi: “Keirau dau kerei ratou na gone me ratou vakasamataka na veika eratou taleitaka me baleti keirau, kei na veika eratou taleitaka me baleti tuakadratou se tacidratou. Oti eratou dau kerei me ratou vakamacalataka nodratou nanuma ena neitou sokalou vakavuvale. Eratou vulica e keri me ratou dau kauaitaka qai vakavinavinakataka na veika era vinaka kina eso tale.”

“Sa Qai Vakainaki Dina Noqu Bula!”

E yaga tale ga ena nodra toso vinaka na itabagone na nodra lesi ena so na itavi ena ivavakoso nira se gone. E kaya o Nestori a papitaiso ni se qai yabaki 11: “Eratou lesi au na qase ena so na itavi lalai niu se gone. Au vakadeitaka kina ni tiko na kequ yaga ena ivavakoso.”

 E yaga dina nodra veitokoni na qase kei na nodra ivakaraitaki vinaka eso tale. E kaya o Koba, dua na taci Nestori: “Au duidui toka vei ratou na vo ni taciqu ni levu na ka dredre au sotava niu se itabagone. Ia e ivakaraitaki vinaka vei au e dua na cauravou e qase ni ivavakoso, e dau kauaitaki au qai sega ni dau vakalelewa. E vukei au vakalevu meu qaravi Jiova tale.”

Eratou sa veiqaravi tiko ena gauna qo ena dua na yalava tu yawa o Nestori, Koba, kei na ganedrau o Mari. E kaya o Koba: “Sa qai vakainaki dina noqu bula!”

“Muria Tiko na ka Dina na Luvequ”

E veivuke na valenivolavola ni tabana ena nodra veisusu na itubutubu ni dau vakayagataki ira vakalevu na itabagone ena so na taba ni veiqaravi. E kaya e dua na lewe ni Komiti ni Tabana: “Era vakamareqeti na neimami itabagone, oya na vuna keimami dau tokoni ira kina ena nodra sasaga mera rawata na nodra isausau vakayalo.”

Era cakacaka vata na mataveitacini e Georgia kei ira mai vanuatani ena tara ni Vale ni Soqoni Lelevu e Tbilisi

E dau guiguilecavi dredre vua e dua na itabagone na nona cakacaka kei na nona veimaliwai kei ira na mataveitacini matua. E kaya o Mamuka, a veivuke ena tara ni Vale ni Soqoni Lelevu e Tbilisi: “Na cakacaka va qo era veivuke kina mai vanuatani levu sara ga na ka au vulica vei ira. Au vulica na veika me baleta na cakacaka, au vulica tale ga e levu na ka vakayalo.”

E veivuke sara vakalevu ena nodra toso vakayalo na itabagone e Georgia, na nodra veivolekati vakavuvale, nodra veivakayaloqaqataki na qase ni ivavakoso, kei na nodra ivakaraitaki vinaka eso tale. Era duavata na itubutubu e Georgia kei na ka e vola na yapositolo o Joni: “Sega tale ni dua na ka au marautaka vakalevu: niu rogoca nira muria tiko na ka dina na luvequ.”3 Joni 4.

 Cakacaka Levu ni Vakadewa

A kerei ira kece na valenivolavola ni tabana ena 2013 na iLawalawa Dauvakatulewa mera raica ke tiko e dua tale na vosa e vosataki ena nodra vanua e vinakati me tabaki na kena ivola. Na inaki ni sasaga qori mera rogoca kina e levu na itukutuku vinaka.

E mani nanuma na valenivolavola ni tabana e Georgia me vakadewataki eso na ivola ena vosa vakaSvan kei na vosa vakaMingrelia. Na rua na vosa qori e via tautauvata ga kei na vosa vakaGeorgia.

Erau kaya e rua na painia gugumatua mai na yasayasa o Svaneti: “Era kauaitaka dina na nodra bula vakayalo na lewenivanua e Svan, era doka tale ga vakalevu na iVolatabu. E veisau nodra rai e levu era sega ni dau taura noda ivola e liu nira raica ni sa vakadewataki sara ga ena nodra vosanisucu.”

 Era luluvu e levu na dautukutuku era vosa vakaMingrelia ni sa caka na soqoni ena nodra vosanisucu. E kaya e dua na painia cauravou o Giga: “Au sa rawa ni vakamacala ena noqu vosa ga ena gauna ni soqoni. E liu, au dau vakadewataka rawa ena noqu vakasama na ka meu kaya au qai vakamacala.”

E duavata kei na tacida qori o Zuri, dua na qase ena ivavakoso vakaMingrelia e Tkaia. E kaya: “Levu na ka marautaki, levu tale ga na ka rarawa au sotava ena noqu bula. E sega ni bau dua na ka qori e vakatagici au. Ia na imatai ni gauna e lagati kina na noda sere ena vosa vakaMingrelia, era tagi kece na tiko ena soqoni wili kina o yau.”

Soqo Vakairogorogo

Dua na soqo vakairogorogo ena kedra ivolatukutuku na tacida e Georgia a vakayacori ena Vakarauwai na ika6 ni  Epereli, 2013. A vakatabui kina na valenivolavola ni tabana, dua na Vale ni Soqoni Lelevu, kei na dua na vanua me dau caka kina na vuli vakalou. A vunau ena soqo qori o David Splane, e lewe ni iLawalawa Dauvakatulewa. Era lomasoli e levu na mataveitacini e Georgia mera vakaicilitaki ira na le 338 na vulagi mai na 24 na vanua.

Dua tale na ivunau lavotaki ena siga tarava. Era rogoca se sarava rawa na porokaramu qori e le 15,200, ni vakayagataki na vidio me semai ira na vale ni soqoni e Georgia taucoko ina vanua e vunau kina o Brother Splane. Qori na soqo levu duadua mera bau marautaka na mataveitacini e Georgia. E vakatubuqoroqoro dina meda raica nodra veivakayaloqaqataki kei na nodra mamarau na mataveitacini. E kaya e dua na tacida cauravou: “Qo na sabolo ni veika ena yaco ena vuravura vou.”

Vakatabui ni valenivolavola ni tabana e Tbilisi, 2013

E vakilai vakalevu e Georgia na yaga ni Koronivuli ni Vuli iVolatabu ni Veiwatini, sa kilai ena gauna qo me Koronivuli ni iTalatala ni Matanitu. Era sa vuli oti ena koronivuli qori e sivia na le 200 me tekivu mai na 2013. Dua na ka nodra marautaka na gonevuli na veika era vulica, e uqeti ira sara ga mera lai veiqaravi ena vanua cava ga e vinakati kina na veivuke.

“Tadolova na ka e tu Mai Liu”

Sa roboti Georgia na itukutuku vinaka ena vuku ni nodra gugumatua na isevu ni dautukutuku ni Matanitu ni Kalou. A vakalougatataki ira vakalevu na tacida o Jiova ena vuku ni nodra lomana na Kalou kei na kainodra, nodra vakabauta, yaloqaqa, kei na nodra yalorawarawa.

Era vakadeitaka na sivia na le 18,000 na mataveitacini e Georgia mera tomana tiko ga na cakacaka era tauyavutaka na nodra itokani ena veiyabaki sa sivi. Qori na nodra vukei e levu tale mera vakadinadinataka na kaukaua ni Vosa ni Kalou.Fpai. 3:13; 4:13.

Komiti ni Tabana e Georgia: Wayne Tomchuk, Levani Kopaliani, Joni Shalamberidze, Michael E. Jones