Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 GEORGIA

Au Raica Sara ga e Mataqu!

Pepo Devidze

Au Raica Sara ga e Mataqu!
  • SUCU 1976

  • PAPITAISO 1993

  • KENA ITUKUTUKU A susu ena lotu Orthodox, qai dau saga me muria vinaka sara na kena ivakavuvuli. Gauna e taura kina na dina, rau lai veiqaravi sara e Peceli kei na watina. Erau painia lavotaki tiko ena gauna qo.

AU SE kilai ira sara na iVakadinadina niu se vuli tu e Kutaisi. A kaya vei au e dua keitou tiko veitikivi nira sega ni vakayagataka na ivakatakarakara na iVakadinadina ena nodra sokalou, era sega tale ga ni vakabauta ni Kalou o Jisu. Qori e veisaqasaqa kei na vakabauta ni lotu Orthodox.

Niu lesu i Tsageri ena 1992, au rogoca sara nira tiko tale ga e kea na iVakadinadina. E levu na ka vinaka e sa rogoca me baleti ira o tinaqu. Ia e sega ni veisautaka qori noqu rai me baleti ira, e mani kaya vei au: “Lako, mo lai raica sara ga na ka era vakavulica.”

Erau dau sikova tiko yani e dua na vuvale ena neitou yasayasa e rua na painia o Pavle kei Paata. Era dau marautaka e levu na nodrau gole yani, era dau vakarogoci rau, ra taro  tale ga. Au mani nanuma meu lai vakarorogo tu mada. Gauna kece au taro kina, erau dolava na iVolatabu rau solia vei au meu wilika. Qori e veisautaka noqu rai, niu raica sara ga e mataqu na ka e kaya na iVolatabu!

Sega ni dede au sa vulica tale ga na iVolatabu, oti keitou sa papitaiso sara e le tini. A qai dua na iVakadinadina i Jiova o tinaqu.

Niu railesu, dua na ka noqu vakavinavinaka ni rau sauma noqu taro na painia ena nodrau solia vei au na iVolatabu meu wilika sara ga kina na kena isau. E vukei au vakalevu qori meu dei niu tusaqati ena vuku ni ka au vakabauta. Au sa vakayagataka tale tiko ga qo na iwalewale au taleitaka kina na ka dina ena imatai ni gauna, oya me dola sara ga na iVolatabu mera raica kina eso tale na ka dina!