Erau rogoca na veiwatini painia lavotaki ena dua na yalava tu yawa e Brazil na itukutuku kei Valdira, e dua na yalewa a vulica na iVolatabu ena 13 na yabaki yani e liu. Erau muria na gaunisala kuvu, qai rerevaki na kui ni uciwai erau takosova ena nodrau sasaga me rau lai sotavi Valdira. Dua na ka nona vinakata o Valdira me tomana tale nona vuli, ia e tuvanaki e dua na sala veiganiti me caka kina qori ni yawa na vanua  e vakaitikotiko kina. E vakamobail o Valdira, ia ena rawa ni qai lai vakayagataka sara ena dua na were e yawa mai nona vale. E rawa tale ga ni qai vuli ena ciwa na kaloko ena bogi. Raitayaloyalotaka mada, dua na yalewa e vakayagataka tiko na nona mobail me vuli iVolatabu kina ena bogilevu qai cina kadrala.

E dau rogoca tale ga ena nona talevoni o Valdira na porokaramu ni soqoni ena Sigatabu. Ni gole ina were, ena kauta nona iVolatabu, Vale ni Vakatawa, kei na ivolanisere. Ke tau na uca ena kauta tale ga nona iviu.

E gole ina dua na Vale ni Soqoni voleka o Valdira ena vula o Maji. Qori me lai tiko ena soqo lavotaki e sevutaki kina na itabataba vakavoutaki ni iVolatabu na Vakadewa ni Vuravura Vou ena vosa vakaPotukali. Dua na ka nona marautaka na iVolatabu vou. Nira vakacaucautaki Valdira na mataveitacini ena vuku ni sasaga e cakava me vulica na iVolatabu, e dau kaya: “O, e sega soti ni dredre!”

Era vakaitikotiko e Colombia na Yukpa, e dua na matatamata era toki yani ena yasayasa vakaMerika. E via lai vunau ena dua na nodra itikotiko o Frank, e painia lavotaki. Ia e tukuni vua me qarauni John Jairo, na iliuliu ni vanua a cemuri ira mada mai keri eso era via lai caka lotu yani. Dua na gauna a rogoca o John ni kumuna tiko na ikatini e dua na italatala, e qai gutuwa ga na italatala qori ni sa vanataka i macawa o John nona dakai.

E nanuma lesu o Frank: “Ni keitou yaco yani ena nodra itikotiko, a vakarorogo sara ga e liu ina neitou ivakamacala o luvei John Jairo yalewa! Ni vakaraitaki vua na ivola Na Cava  Mada e Kaya na iVolatabu?, e kaya, ‘Qo sara ga na lotu au via lewena!’ E cici me lai tukuna vei tamana, sega ni dede keitou sa kacivi. Keitou via lomaleqa ni keitou sota, ia ni bera ni keitou vakamacala sa tukuna o koya: ‘Au kila ni dou lotu dina. Ena walu na yabaki sa oti, au a kunea e dua na ivola va qori ena isovasova ni benu e Becerril, au wilika, au sa qai waraka tu moni lako mai ke. Au kila ni oni na yaco sara mai ke ena dua na siga. Au vinakata mo dou vakavulici au, ratou noqu vuvale kei ira kece na lewe ni itikotiko qo ena iVolatabu. E dola tu vei kemuni na katuba.’

“E tonawanawa na mata i keitou ena ka e tukuna qori. Era soqoni vata mai na lewe ni itikotiko, keitou vakamacala  sara, qai vakadewa vei ira ena nodra vosa o John Jairo. Ni keitou vakarau biubiu, e solia vei keitou o John e dua na asa lailai me usana neitou kato. Sa ra vuli iVolatabu tiko ena gauna qo e le 120 na lewe ni matatamata na Yukpa ena duidui itikotiko. Erau wili e keri o John Jairo kei na luvena yalewa.”

E tiko e Ecuador o José, e dua na duru ni lotu Katolika e liu. E vola: “Dua na ka noqu dau sevaki ira na iVakadinadina i Jiova. Au tusaqati ira voli me tini na yabaki. Au liutaki ira na dauvakacaca, vakamavoataki ira na iVakadinadina qai beitaki ira nira daubutako. Nira kau ina siteseni ni ovisa, au dau kerea sara ga meu cobara na loka ena rumu era vesu  kina. Keimami vakacacana ena dua na gauna nona motoka e dua na iVakadinadina. Dua tale na gauna, keimami kolotaka sobu ina baba e dua na nodra basikeli na iVakadinadina.

“E tauvi au e dua na matetaka rerevaki ena 2010. E kaya noqu vuniwai meu biuta noqu vale ena veiulunivanua na Andes meu lai vakabulabula e baravi ni katakata vinaka kina na draki. Au gole sara ina nona vanua ni teitei e dua na wekaqu voleka e toka e baravi. Niu tu duadua, au dau galili qai vinakata sara ga meu veitalanoa kei na dua. O kila o cei e qai gole yani? O ira na iVakadinadina i Jiova! Ena levu ni noqu galili au veitalanoa kei ira qai qoroya nodra kila vinaka na iVolatabu. Au vakadonuya meu vulica na iVolatabu ni levu na noqu lomatarotaro. Ni oti e ono na vula noqu vuli, au sa qai gole ena imatai ni gauna ina soqoni. Au drukataka na levu ni nodra yalovinaka kei na veikauaitaki, au mani kaya lo, ‘Era rairai tamata dina ni Kalou o ira qo!’ E toso vinaka noqu vuli, au qai papitaiso ena Epereli, 2014.

“Au rarawataka sara ga noqu tusaqati ira na iVakadinadina. Ia e vakarautaka vei au o Jiova e dua na sala meu kere veivosoti kina vei ira eso. Au vakatarogi me baleta noqu dau veitusaqati e liu ena dua na soqo ni tabacakacaka ena ika4 ni Okotova, 2014. E tarogi vei au, ‘Ke rawa, o cei vei ira o dau tusaqata o na via kere veivosoti kina?’ Au tukuna sara na yaca i Edmundo, ia au sega ni kila na vanua e sa tu kina. Au sega ni kila ni sa duri tu na tacida qori ena daku ni buturara. Dua na ka nodra luluvu na vakarorogo ni keirau veimokomoko qai veitagicaki kei Edmundo ena buturara.”

Dua na ka na warumisa ni siga, ia sa mai cava vinaka nodratou vunau e dua na iwasewase lailai e Asunción, Paraguay.  Eratou nanuma me toso tale vakalailai na cakacaka, ratou mani tara e vica na vale era toka voleka. E kaya e dua na tacida: “De masu tiko e dua.” E matadredredre sara mai e dua na yalewa ena dua na vale e toka voleka ga qai tarogi rau na tacida ke rau iVakadinadina i Jiova. E tukuna ni a vuli iVolatabu tu mai Bolivia, ia sa toki mai Paraguay ena vuku ni cakacaka. Ni sega ni dua ena itikotiko ya e kila na vanua era tiko kina na iVakadinadina, e mani masuta: “Kerekere, Jiova, meu sotavi ira nomu iVakadinadina.” Ena siga tiko ga qori, erau sikovi koya yani na tacida qai tauyavu na vuli iVolatabu.