E gauna marautaki vei ira na mataveitacini e Igiladi kei ira na vulagi mai na so tale na vanua, na soqo cokovata ni veimatanitu e Lodoni. Erau gole ina dua na otela o Andrew kei Elizabeth me rau lai vakabula vei ira na mataveitacini mai vanuatani. E raica o Elizabeth e dua na marama e rakorako nona isulusulu, e lai mokoti koya sara ni nanuma ni  dua vei ira na tacida mai vanuatani. Ia e kidacala na marama ya, mani kere veivosoti vua o Elizabeth qai kaya: “Vosoti au, au nanuma de o dua vei ira na mata!”

“Na mata cava?” e taroga na marama e kilalecataka o Elizabeth.

E dusia sara o Elizabeth na ivakatakilakila ena desi era kidavaki toka kina na tacida, qai kurabuitaka na nona kaya na marama ya: “Sa dua na ka totoka. Vakacava, au vaka na iVakadinadina i Jiova?”

Erau veitalanoa sara, sa qai kila o Elizabeth ni yaca ni marama ya o Vivien, e cavutu mai Nigeria rau qai toka veivolekati ga kei Elizabeth. A vakadonuya o Vivien me vulica na iVolatabu, me ratou vuli tale ga na luvena. E liu se mokoti Vivien o Elizabeth, ia qo sa mokoti rau na veiwatini o Vivien ni rau yaco yani ena nona vale. Nodrau sota vakacalaka kei Elizabeth e tarai Vivien sara ga. Erau kidacala o Andrew kei Elizabeth ni gauna erau vakaraitaka kina na ivola na Kaya na iVolatabu, e tukuna o Vivien ni sa tiko rawa vua na ivola ya, sa dau wilika tale tiko ga kei ratou na va na luvena. Ni rau tukuna vei Vivien na veiwatini ni rawa ni vulici wale ena ivola ya na iVolatabu, sega ni bera nona kaya: “Tou sa tekivu sara ga qo!”

A tauyavu ena Noveba 2014, na imatai ni ivavakoso ena vosa vakaRomany e Slovakia. Era papitaiso ena dua na soqo ni tabacakacaka se qai caka toka ga qo e le 21 na dautukutuku era vosataka na vosa qori ra qai koro vata  ga. Era le 495 na tiko ena iVakananumi. Qo na nona ivola e dua vei ira na tacida tagane a papitaiso:

“Au lewena na matatamata na Roma, e Žehra, Slovakia. Ena nodra rai e levu na yago vulavula ena vanua au tiko kina, keimami matatamata duka qai dauveitokiyaki, keimami daulasu, daubutako tale ga. Niu via lai lotu, e vakatalai au na italatala qai kaya ni sega ni dodonu meu gole yani e kea. Na ka kece qori e vakavuna noqu raici ira vakatani na yago vulavula. Era qai sureti au na iVakadinadina i Jiova ina nodra Vale ni Soqoni. Au a nanuma ni na vaka ga na ituvaki au sa sotava oti. Ia au kidacala ni se bera mada ga niu curu ina Vale ni Soqoni, e kauaitaki au e dua na turaga yago vulavula, mai lululu sara. Au sega ni vakarorogo vinaka ena ivunau soqovi levu niu vakasamataka tiko ga, ‘E rawa vakacava nira vinaka vei au o ira kece qo?’

“Niu lesu i vale ni oti na soqoni, au sega ni moce niu vakasamataka tiko ga na veika e yaco ena Vale ni Soqoni. Au mani nanuma meu gole tale meu raica ke sa veisau na veika vinaka e vakayacori vei au. Na ikarua ni gauna qo, e sa qai vinaka ga nodra ivakarau vei au na tiko ena Vale ni Soqoni, e vaka ga keimami sa veitokani makawa tu. Au gole tiko ga ina soqoni, au papitaiso sara ni toso na gauna. Era yalovinaka tu ga na mataveitacini niu papitaiso oti, era vakamareqeti au tu ga. Na kakana era dau solia vei au ena so na gauna e totoka sara mai na veika era kania! Au via lewena tiko ga na isoqosoqo qo, au via qarava tale ga na Kalou o Jiova me tawamudu.”

A vodo basi tiko e dua na tacida yalewa o Aysel mai na tauni o Ganja me gole i Baku, e Azerbaijan. A vakaraitaka  sara vei Jiova ena masu ni via veitalanoa vakaivolatabu kei na dua. Sa tiko na vanua me dabe kina o Aysel ena basi, ia e vinakata e dua na marama me lai dabe tikivi koya. Ni rau veitalanoa tiko, e vakamua sara ina iVolatabu o Aysel na veitalanoa. E kaya na marama ya ni lomani Jisu qai via kila e levu tale na ka me baleti koya. Erau dui solia na nodrau naba ni talevoni, rau qai veivosakitaka me rau sota tale. E kerei Aysel na marama ya me kauta tiko yani nona iVolatabu.

Ni lesu i Ganja o Aysel, e lai sikovi koya sara na marama tataleitaki ena nona vanua ni cakacaka. E tukuna na marama ya ni tiko na nona “ivola ni masu” e dau wilika e veisiga. E kurabuitaka o Aysel ni ivola ni masu ya na ivola Dikeva na iVolatabu e Veisiga ni 2013! A tauyavu sara na vuli iVolatabu, qai marau vakalevu o Aysel ni vakadoudoutaki koya o Jiova me vunau tawalokuci.

Qo e dua na ivola mai Sipeni:

E kaya o Felicity, e dua na marama yabaki 68 mai Suwiteni: “A sega ni vakainaki tu noqu bula, au qai dau vakamumuri tu ga. Dua na ka noqu vinakata meu lomavakacegu, ia e dreve kece noqu sasaga.” E sega ni marautaka o Felicity na veika e vulica ena lotu Katolika, mani vakadikeva na ka era vakabauta na veimatalotu tale eso. E lai tini sara ena vakatevoro kei na cakaisausau.

Dua na ka nona yalolailai ni sega ni vakainaki tu na nona bula, e dau vakasamataka kina ena so na gauna me vakamatei koya. “Au tagi qai kaci vakadomoilevu vua na Kalou, au kerea me vakaraitaka vei au na ka e vinakata meu cakava. Oti e rua na macawa, sa tukituki tu ena noqu matanikatuba e dua na cauravou. E matadredredre qai taroga keu via rogoca na Vosa ni Kalou. Au kaya lo ga, ‘O segai, kemuni na Kalou, au a sega ni kerea qo—mera lako mai na iVakadinadina i Jiova!’”

A via sogota na katuba o Felicity, ia e nanuma me sa vakarorogo mada ga. A qai vakadonuya me vulica na iVolatabu ena ivola Kaya na iVolatabu. E kaya o Felicity: “Levu sara ga na ka vou au mai vulica ena iVolatabu.” A papitaiso ena dua na soqo ni veiwasewase e Suwiteni ena 2014. Sa rawa ni kaya ena gauna qo: “Au vaqaqara voli ena noqu bula taucoko. Au sa qai vakila qo na lomavakacegu.”