E kilai levu ena dua na vanua vakaEsia e dua na yalewa e dau vakaraitaki ena iyaloyalo qai dau vakaitavi ena veisisivi isulu e dau maketetaki. Ia e mai vulica na iVolatabu qai bulataka sara na veika e vulica. E biuta laivi kece na nona ivola ni vakatevoro kei na matakau ni lotu Buda.

 E vakamasuti koya nona itokani voleka: “Vakacava me cegu na vuli iVolatabu me tolu ga na yabaki me toso vinaka mada nomu cakacaka? Oti o rawa ni qai vuli tale.”

E sauma o vuli iVolatabu: “Au vaqarai Jiova voli me 24 na yabaki, au sa qai kunei koya. Na cava me cegu tale kina noqu vulici koya me tolu na yabaki?”

E solia vua e dua na kabani ni caka iyaloyalo e dua na konitaraki ena macawa me curu kina ena Koronivuli ni Vuli Vunau. Ena cakacaka ena kabani qori me va na yabaki, dua tale ga na ilavo vinaka ena rawata ke vakaraitaki ena iyaloyalo cava ga e tukuni vua. Ia a vakasuka na konitaraki. Ena Me 2014, a vakadonui me dua na dautukutuku bera ni papitaiso qai lalawataka me vakayagataka e 100 na aua ena cakacaka vakavunau ena Okosita. Ni tarogi vua na vuna, e kaya: “Au via marautaka na 100 na yabaki ni veiliutaki i Jisu ena noqu vunau me duanadrau na aua!” E rawata qori qai papitaiso ena Janueri 2015. Sa painia veivuke tiko ena gauna qo.

Eratou vodo basi e va na tacida yalewa me ratou lai vunau ena dua na vanua se sega ni lesi e Sri Lanka, era levu kina na lotu Buda. E tarovi ratou e dua na bete kei na dua na draiva ni teksi ena ikarua ni siga ni nodratou vunau. Sega ni dede era sa wavokiti ratou e le 30 tale qai dua na ka na nodra cudru. E mai kauti ratou na ovisa ina siteseni, ratou lai vesu tu kina me dua na bogi. E sega ni dua na nodratou cala, ia ratou lai sogo kei ira na daubasulawa voravora. Eratou vosavakacacataki, ratou rogoca tale ga na vosa vakasisila. Ia eratou raica ni qo e dua na sala vinaka  me ratou vunau kina. E kaya e dua vei ratou na tacida yalewa qori: “Au vesu tu kei ira na daulaba, ia au wasea rawa vei ira na ka dina. Dua na ka na levu ni nodra taro, ra kurabuitaka tale ga noqu vesu. E tarogi au e dua, ‘Cava o sa rui mamarau kina?’”

Sa ciqoma na Mataveilewai Cecere e Sri Lanka na neitou kerekere me rogoci e dua na kisi ni veilewai. Qori ena vuku ni nodra sega ni doka na ovisa na dodonu ni tamata nira vesuka e dua e sega nona cala. E se tu vakawawa na kisi qori.

Erau vuli iVolatabu tiko ena vosa vagalu na tacida yalewa painia o Michiko kei na dua na marama ena dua na valenibula e Japani. E tarogi ira na dauveiqaravi na tacida yalewa ke ra tiko eso tale na tauvimate e rawa ni veitalanoa kei ira. Erau sota sara kei Kazumi, e dua na yalewa sa davo tu ga vakadua ena vuku ni vakacalaka e gaunisala ni se yabaki 23. E sega ni rawa ni vosa, tiloma na kena se gunuwai, ia e rawa ni rogo. E vakadonuya me vuli iVolatabu ni via kila e levu na ka.

Ni rau vuli, ena taroga na taro o Michiko qai sauma o Kazumi ni dusia na kena isau ena parakaravu se vola ga. E vakamobail o Kazumi, rau mani raica vata kina e veimataka kei Michiko na tikinivolatabu ni veisiga. E vakila na malumalumu ni yago o Kazumi, ia e bulabula vakayalo. Toso na gauna sa vinakata me iVakadinadina i Jiova. A mai dua na dautukutuku bera ni papitaiso ni oti e 13 na yabaki nona vuli iVolatabu. E sa yabaki 61 toka ena gauna qori.

 Ena vuku ni kena ituvaki, e tuvanaka na ivavakoso me dau rogoca ena talevoni o Kazumi na porokaramu kece ni soqoni kei na soqo lelevu. Era dau wilika tale ga eso na tacida yalewa nona ivakamacala ena soqoni.

E dau veiuqeti qai veivakayaloqaqataki na ivola nei Kazumi vei ira na vuli ivolatabu era gole yani ena soqoni. E nona yalava ni vunau na valenibula, vei ira na veiqaravi kei ira na veisiko yani. E dau kaya vei ira: “O na marau ke o vulica na iVoIatabu.”

Ena Cevaicake kei Esia, erau sota kei na dua na bete e dua na tacida yalewa a lako tiko vua na vuniwai ni mata. E tarogi bete na tacida: “O vinakata mo bula uasivi qai bula tawamudu ena dua na vanua totoka?” Erau veitalanoa  vinaka sara, e taura tale ga na bete na brochure Vakarorogo Vua na Kalou. E solia na nona naba ni talevoni vua na tacida yalewa, lai soli sara vua e dua tale na tacida tagane ena ivavakoso. E sikova na bete na tacida qori qai sureti koya ina dua na ivunau lavotaki. Dua na ka nona marautaka na bete na soqoni qori, vakauasivi na lagati ni noda sere. E kurabuitaka tale ga na nodra kauaitaki koya kece na tiko ena soqoni.

E taroga na bete ke tiko e dua na noda koronivuli ni lotu se Univesiti. Ia e vakamacalataka vua na tacida nida dau caka vuli iVolatabu, qai sureti koya sara me vuli. Ena macawa ga e tarava, erau sa otiva tale na wase 1 ni ivola Na Cava Mada e Kaya na iVolatabu? E tomana tiko ga nona vuli, tekivu gole ina soqoni, vakamacala tale ga ena Vuli Vale ni Vakatawa.

Ni gole na bete ina soqo ni tabacakacaka, e sureti koya na mata mai na valenivolavola ni tabana me gade i Peceli. Dua na ilakolako balavu qori ni tauri koya e rauta ni 10 na aua me qai yaco i Peceli. Ia dua na ka nodra kauaitaki koya na lewenivuvale e Peceli. A vakasuka nona itavi vakabete ena Feperueri 2015, e se marautaka tiko ga nona vuli iVolatabu kei na nona dau vakaitavi ena soqoni.

Erau lesi ina vuaicake kei Idia e dua na veiwatini painia, qori ena dua na vanua sa sega ni caka tu kina na vunau me vica na yabaki. E levu na tataleitaki, erau mani vaqara e dua na vanua me caka kina na soqoni. Ni rau lai caka vuli iVolatabu ena dua na siga, rau raica sara e dua na vale se qai tara tiko. Erau nanuma me rau qai taro kina ni rau lesu mai. Ia e veisau na nodrau vakasama, rau sa gole ga ena gauna ya me rau lai taro. Erau sotava sara e dua na marama,  erau kaya vua ni rau iVakadinadina i Jiova. Dua na ka nona marau na marama qori, e kaya: “Au dua tale ga na iVakadinadina i Jiova,” oti e sureti rau sara ina nona vale qai vakaraitaka vei rau nona ivola kece ni isoqosoqo mai na veiyabaki ni 1970 kei na 1980. A vuli iVolatabu tu na marama qori kei ira na painia ena 30 na yabaki yani e liu. E dau gole tale ga ina soqoni, dina ga ni dau tusaqati koya o watina. E vakadeitaka ni sa kunea na ka dina, ia e sega ni sotava e dua tale na tacida nira sa biubiu na painia. Era lai lewena na luvena eso tale na lotu, ia a sega ni cakava qori o koya.

Dua na gauna lekaleka sa oti, eratou tukuna vua na  luvena me sa lai lotu Katolika me rawa ni caka kina nona lotu ni veibulu ke mani mate. E saga tale ga o tacina me kauti koya ina valenilotu ni Katolika, ia rau sega ni yaco i valenilotu ena osooso ni gaunisala, rau mani lesu i vale. E kaya o tacina me rau qai gole tale ena siga tarava, ia erau mani sega ni lako ni tauvimate na marama tataleitaki. Ena yakavi sara ga ni siga qori, ratou sota kina kei rau na veiwatini painia! E sa tomana tiko ena gauna qo nona vuli iVolatabu, kei na nona gole ina soqoni. Sa uqeti ira tiko na luvena kei na makubuna mera vulica na iVolatabu.