Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Burundi: E vakaraitaka tiko o Nolla vei rau na mai kere qilaiso Na Vale ni Vakatawa

 VUNAU KEI NA VEIVAKAVULICI E VEIYASA I VURAVURA

Aferika

Aferika
  • VANUA 58

  • LEWENIVANUA 1,082,464,150

  • DAUTUKUTUKU 1,453,694

  • VULI IVOLATABU 3,688,959

Usa Pasidia, Vunau Tale Ga

Benin: Vakayagataka o Désiré na retio ni nona motopai me vunau kina vei ira nona pasidia

E dau nodra sala ni veitosoyaki ena koro lelevu ena ceva kei Benin na motopai. E tiko nona motopai o Désiré, e dua na painia veivuke, qai cobara kina e dua na retio kei na kena sipika. E dau vakatagitaka na katokatoni ni noda ivola kei na drama vakaivolatabu. Era dau vakarorogo vinaka sara na pasidia nira vodo ena nona motopai. E levu era dau via vodo tu ga mera rogoca vakaoti na katokatoni ena levu ni nodra taleitaka. E kaya o Désiré:  “Au dau vinakata mera sauma ga nodra ivodovodo, mera sobu meu rawa ni vaqara pasidia tale, ia au kila ni nodra rogoca na itukutuku vinaka e bibi cake mai na ilavo. Au solia rawa tale ga e levu sara na ivola.”

E Sasaga Tiko Ga

Eratou vakaitikotiko ena veidelana e Burundi na vuvale i Nolla e dua na goneyalewa yabaki ono. Ni ratou vakasaqa tiko ena sitovu qilaiso ena dua na siga, rau lai kere qilaiso yani e rua na tagane. A toka volekata na sitovu o Nolla qai solia e vica na tiki ni qilaiso. Dua na ka nona rarawa ni raica ni rau a lai waqara kina na kedrau tavako. E tukuna vei rau: “Keu a kila ni drau na waqara kina na kemudrau tavako keu a sega sara ga ni solia vei kemudrau na qilaiso.” E vakasamataka sara o Nolla ni a raica ena Vale ni Soqoni e dua na mekesini a taba tu kina na tavako. Mani cici ina Vale ni Soqoni me lai kauta mai e rua na ilavelave ni Vale ni Vakatawa ni 1 June, 2014. E solia sara vei rau na tagane qori qai tukuna me rau wilika. Ni ratou sota tale ena dua na gauna, e sureti rau ina soqo ni veiwasewase. Erau drukataka na nona sasaga na goneyalewa qo qai uqeti rau sara ga me rau tiko ena rua na siga ni soqo. E sureti rau o Nolla me ratou vakasigalevu vata kei na nona vuvale. E uqeti rau dina na veika rau raica kei na veika rau rogoca ena soqo qori, erau vulica sara kina na iVolatabu.

Vunau e Valeniveivesu

Era sa vunautaka tiko na qase ni ivavakoso e Liberia na itukutuku ni Matanitu ni Kalou ena valeniveivesu  ena vanua qori. E vakamacalataka o Yves, e dua na painia lavotaki ena koroturaga o Monrovia: “Eratou rawata e tolu na kaivesu ena vula o Maji na ivakatagedegede me ratou dautukutuku bera ni papitaiso. Sa ono kina na iwiliwili ni dautukutuku ena valeniveivesu e Monrovia.” Eratou vunau vakacava? E vakamacalataka o Yves: “Eratou sota e veimacawa ena Vukelulu kei na Vakarauwai, ratou qai dau vunau vei ira na kaivesu.” Sa ra marautaka tiko ena gauna qo e levu na kaivesu nodra vulica na ivolatabu kei na soqoni e dau caka e valeniveivesu. Dua na gauna a lai vunau ena valeniveivesu qori e dua na tacida mai na valenivolavola ni tabana. Era rogoca na ivunau e le 79 na kaivesu. Sa vakayacori tiko ena ono tale na valeniveivesu na vuli iVolatabu qai laurai na veisau levu vei ira na kaivesu.

“Vinakati Vakalevu na Veivuke”

Dua na ka na sasaga e caka mera tiko rawa ena iVakananumi na tataleitaki mai na veivanua tu yawa. Dua na kena ivakaraitaki o ira na San, o ira na matatamata qo era tawana taumada na veivanua ena ceva kei Aferika. Era bula rawarawa qai dau veitokiyaki. E nodra cakacaka na vakasasa kei na teitei. E tuvanaka o Glenn e dua na painia lavotaki ena vualiku kei Namibia me vakayacori na iVakananumi ni 2015 ena dua nodra koro vagalala na San. E tiko na koro qori ena rauta ni 270 na kilomita ena tokalau kei Rundu. Qori sa ikarua ni gauna me caka kina e kea na iVakananumi, ra qai solia wale vei ira na tacida na  iliuliu ni koro na valeniveilewai me caka kina na soqo. Dua na ka na bisa ni uca ni bera ni tekivu na iVakananumi kei na gauna e vakacagau tiko kina, ia era tiko rawa e le 232. Era vosataka na San na vosa vaKhwe, e dau kilai ena kena vakarogotaki vata na vosa e cavuti kei na rorogo ni yamedra. A vakadewataki na ivunau ni iVakananumi mai na vosa vakavalagi ina vosa vaKhwe. E se sega ni dua na iVolatabu ena vosa vaKhwe, e mani vakayagataki eso na itaba duiroka veicavuyaki me vakamacalataki kina na tikinivolatabu me vaka na Aisea 35:5, 6. Era toso vinaka ena vanua qori na vuli iVolatabu nei Glenn, e kaya: “Sa rua na yabaki noqu gole tiko mai e veivula ena vanua qo. Au dau keba eke me vica na siga. E berabera toka na toso ni cakacaka ena vanua qo ni dredre na kena vosa qai yawa na vanua. E vinakati vakalevu na veivuke. Niu lai veivosaki kei ira na vakailesilesi me baleta na iVakananumi ena yabaki qo, a kerei au e dua na lewe ni komiti e qarava na itikotiko ke rawa ni tara eke e dua na vanua ni sokalou. E kaya ni ratou na solia e dua na qele qai vakailavotaka na kena tara na vale! Me keitou raica ga e dua me kena ‘italatala,’ se vakavulici e dua vei ira me italatala!”

Namibia: Vunau tiko e rua na tacida vua e dua na marama ni Himba