Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

iVola Mai na iLawalawa Dauvakatulewa

iVola Mai na iLawalawa Dauvakatulewa

Raveitacini:

E yalomalumalumu ni vakadinata na parofita o Aisea ni rawaka ga na matanitu o Juta, qai tiko vinaka ena vuku ni veivakalougatataki i Jiova. E kaya ena Aisea 26:12: “Kemuni Jiova, . . . [na] ka kece keimami vakayacora oni cakava vei keimami.” Eda na duavata kei na vosa qori nida vakasamataka na veika e rawati ena yabaki ni cakacaka ni isoqosoqo sa oti. E cakava dina tiko o Jiova “na ka veivakurabuitaki e se sega vakadua ni caka.” (Lako 34:10) Vakasamataka mada eso na ka sa vakalougatataki keda kina o Jiova.

Na noda website vakadonui na jw.org, e sa vakayagataki sara tiko vakavinaka. E vakarautaki ena gauna qo ena sivia na 600 na vosa, qai rawa ni wiliki se download na ivola ena sivia e 750 na vosa. E vukei ira vakacava na yalomalumalumu na noda website mera mai kila na ka dina? Rogoca mada qo: Erau rarawa vakalevu e dua na veiwatini ena vuku ni veivakaisini rau raica ena lotu. Ni rau qara voli na veidusimaki vakayalo, rau kunea sara noda website. Rau rai wasoma kina me rau wilika noda ivola qai sarava na vidio. Erau kopitaka na ivola Dikeva na iVolatabu e Veisiga, rau qai wilika kei na rua na luvedrau itabagone. Qori sara ga na ka eratou cakava tiko nira cakacaka vakavunau yani na iVakadinadina i Jiova ena dua na mataka. Sa  qai kilai e keri ni ratou sa cakava e levu na veiveisau ena vuku ni ka eratou vulica ena noda website. Sa kau laivi na tatu, biu tani na sau dau cobacoba tu ena yago, vakarusai na ivakatakarakara, muduka nodratou solevutaka na olodei vakavuravura, kei na saravi ni iyaloyalo tawakilikili. E vakayacori na veiveisau kece qori ni bera mada ga nira yaco yani na tacida! Gauna e vakarautaki kina na ivola qo, erau sa dautukutuku na itubutubu kei na dua na luvedrau. Erau sa lalawataka tale ga na veiwatini me rau na papitaiso ena dua ga na gauna lekaleka qo.

Era sa vakaraitaka tale ga e levu nodra vakavinavinakataka e dua tale na isolisoli totoka, na JW Broadcasting. Sa rawa ni saravi e veivula na porokaramu qo ena sivia e 70 na vosa, ena vakarautaki ena levu tale na vosa ni toso na gauna. Era dau sarava e levu na vuvale na porokaramu qori ena nodra gauna ni Sokalou Vakavuvale. E kaya e dua na tacida tagane: “E vakasakiti na tubu e rawati tiko ena isoqosoqo i Jiova, sa totolo tale ga noda kila na itukutuku mai na veiyasa i vuravura!”

E gauna marautaki tale ga vei keda na tamata i Jiova na soqo ni veiwasewase, qai vakadinadinataki qori ena yabaki ni cakacaka ni isoqosoqo ena 2015. E vakaraitaki ena noda soqo e 42 na vidio, na droini kei na itaba, e vakarautaki tale ga e ono na ivakatagi totoka me rogoci ni tekivu e dua na wase ni porokaramu. E kaya e dua na tacida sa dede ena dina: “E vaka me sega ni dua e via biuta nona idabedabe ni vakacagau tiko na porokaramu, era sega ni via calata e dua na ka.” E kaya e dua na tacida daukaulotu: “Sa qai dei ga noqu  vakabauta na ka dina kei na noqu nuitaka na Matanitu ni Kalou niu sarava na vidio e vakarautaki.”

E vakalougatataki keda tale ga o Jiova ena kena vakarautaki e vica noda sere vou. Erau vola e dua na veiwatini: “E vaka ga e mokoti keirau o Jiova ni keirau rogoca na sere vovou qo. E veivakacegui dina ni sotavi na ituvaki dredre.” Eda lai vakasamataka kina na cakacaka levu e vakayacori ena kena vakarautaki na sere kei na ivakatagi, e kena inaki ga me vakalagilagi kina o Jiova!

Keitou uqeti kemuni moni vakatotomuri Jiova ena nomuni ciqomi ira vakayalololoma na lesu yani ina ivavakoso

Vakacava, e vakayagataka vinaka tiko nomu ivavakoso na qiqi ni vunau e matanalevu? Sa vakilai e levu na veivakalougatataki ena iwalewale ni vunau qo! Sa ra rogoca kina na ka dina e levu era tu ena vale dau loka tu ga na kena matamata se vakatabui meda veisiko kina, sa yaga tale ga vei ira na tacida era malumalumu vakayalo. Ena Janueri 2015, e gole yani e dua na turaga ina qiqi ni vunau e Sauca Korea. E kaya ni wale tiko ga qo e vakasamataka sara tiko vakabibi na veika vakayalo, mani tauyavu kina na vuli iVolatabu. Ena vula o Feperueri, e gole ena imatai ni gauna ina soqoni, qai biuta na vakatavako ena vula o Maji. E veisiko ina valenivolavola ni tabana e Sauca Korea ena Epereli, qai toso vinaka tiko ga vakayalo. Qori e dua ga vei ira na irogo keitou ciqoma ena itikotiko liu.

E neitou masu ni veika e vakarautaki ena soqo ni veiwasewase ena uqeti ira na qaravi Jiova tu ena dua na gauna mera lesu vua ni se soli tiko na gauna! Keitou uqeti kemuni moni vakatotomuri Jiova ena nomuni ciqomi ira vakayalololoma qori nira lesu yani ina ivavakoso.—Isik. 34:16.

 Sa vakalougatataki ira dina nona tamata o Jiova ena yabaki ni cakacaka ni isoqosoqo sa oti. Vakacava e tiko eso tale na ka meda nanamaki kina? Qori ena qai tukuna ga o gauna. Ia ena gauna mada ga qo, keitou vinakata na iLawalawa Dauvakatulewa moni kila ni keitou lomani kemuni kece, keitou dau masulaki kemuni tale ga.

Vakanuinui vinaka,

Tacimuni,

iLawalawa Dauvakatulewa ni iVakadinadina i Jiova