DUA na sala bibi eda vakatetea tiko kina na ka dina na iVakadinadina i Jiova na noda vunau e veivale. Ia e laurai ni vuavuaivinaka tale ga na vunau ni vakayagataki na qiqi kei na teveli ni ivola. (Maciu 24:14) Sa vakayagataki tiko ena vunau e matanalevu na vata ni ivola, teveli, kei na kiosk (vale lalai me vaka na kena e caka tu kina nikua na volivolitaki). E vakau tale ga ina ivavakoso e veiyasa i vuravura e rauta ni 250,000 na qiqi ni vunau. Na cava sa rawati kina?

Mai na gauna e tekivu kina ena 2014 na vunau lavotaki e matanalevu e Dar es Salaam, Tanzania, era kerea e rauta ni le 700 na lewenivanua mera vulica na iVolatabu. Era gole e levu na tataleitaki ina soqoni, era sa toro voleka tale ga vua  na Kalou. Dua na yabaki era taura ena qiqi ni vunau na lewenivanua e Aferika kei ira mai vanuatani e sivia na 250,000 na ivola.

E se sega ni yacova na 2,000 na levu ni dautukutuku ena Yatu Solomoni, ra qai vunau tiko na tacida ena 300 vakacaca na veiyanuyanu. E laurai ni vuavuaivinaka sara na vakatetei ni ka dina ena vunau e matanalevu ena siti. Ena koroturaga o Honiara, era veisoliyaka na mataveitacini e sivia na 104,000 na mekesini kei na sivia na 23,600 na brochure. Levu vei ira na taura na ivola era gole mai na veiyanuyanu kei na veikoro tu yawa e sega kina na iVakadinadina. Dua ga na yakavi era veisoliyaka e 400 na ivola Na Cava Mada e Kaya na iVolatabu?, era kerea tale ga e le 60 na lewenivanua mera vuli iVolatabu.

Erau painia tudei e Venezuela o Michael kei Linda. Dua na mataka erau lai vakaduria e dua na vata ni ivola volekata e dua na baravi ena yanuyanu o Margarita. A gole sara yani e dua na turaga o Aníbal, lai taura e dua na ivola Kaya na iVolatabu. E vakamacalataka vei rau na tacida o Aníbal ni mate ena baravi ya o tamana ena vitu na yabaki yani e liu, sa tekivu tale ga mai na gauna ya na nona lomabibi o tinana. Ni gole yani ena macawa tarava o Aníbal, e tukuna vei rau o Michael kei Linda ni macawa oya e ivakananumi ni nona mate o tamana. E qiriti tinana sara, qai kerei Michael me vakamacalataka vua eso na ka ena vakacegui koya. Sa dau qiriti rau tiko o Michael kei Linda na tinai Aníbal, rau qai wasea vua eso na tikinivolatabu veivakacegui. Ni vakauitukutuku vei rau ena nona mobail, e vola  o tinai Aníbal: “Sa daumaka sara noqu bula nikua, ni drau vakacegui au qai vukei au meu vakalevutaka noqu vakabauta.”

Sa vakayacori tiko na vunau e matanalevu ena 127 na vanua ena 14 na korolelevu e Merika. E tauyavu kina e 8,445 na vuli iVolatabu ena imatai ni vitu na vula ena yabaki vakacakacaka ni isoqosoqo ni 2015! Era vukei tale ga e levu ena iwalewale ni vunau qori mera lesu ina sokalou dina. Kena ivakaraitaki, a vakaraica tiko e dua na turaga o Terry na noda teveli ni ivola e Los Angeles, Kalifonia, rau tarogi koya sara na veiwatini rau duri toka e kea ke dau wilika na noda ivola. E kaya o Terry ni dua na iVakadinadina i Jiova, ia sa malumalumu tu vakayalo me rauta ni va na yabaki. Erau wilika qai veivosakitaka kei koya na veiwatini na Isikeli 34:11, e tukuna kina o Jiova: “Au na vaqarai ira . . . na noqu sipi, au na karoni ira.” Rau vakamacalataka vua na noda website kei na JW Broadcasting. Ni imeli vua na tacida tagane o Terry ena mataka tarava, e tukuna ni rua na ka a kerea vua na Kalou ni se bera ni raica na teveli ni ivola. Dua, me vosoti ena nona vakawalena tu na soqoni. Kena ikarua, me vukei me toro voleka vei Jiova. Oti ga ya, e sotavi rau sara na veiwatini. Rau wilika vua na tikinivolatabu, rau qai uqeti koya me lesu ina isoqosoqo i Jiova. E tukuna ni veika e yaco ya e isau sara ga ni nona masu.

E va na vanua e Addis Ababa, Iciopea, e dau vakayacori kina na vunau lavotaki e matanalevu ena siti. Era veisoliyaka na tacida ena loma ni tolu na vula e 37,275 na ivola, ra qai kerea e le 629 mera sikovi. A taura tale ga na ivola Kaya na iVolatabu e dua na qase, qai tekivu wilika ena gauna ga e taura kina. A vuli ena dua na koronivuli ni lotu, ia e tiko eso na nona vakatataro me baleti Jisu kei na  Matanitu ni Kalou. A lesu ena siga tarava ina vanua e taura mai kina na ivola ni vinakata me saumi na nona vakatataro. Oti e rua na siga, a vakadonuya me vuli iVolatabu qai tiko ena imatai ni soqoni ena muanimacawa tiko ga ya. Sa tiko wasoma ena soqoni ena gauna qo, qai toso vinaka tiko vakayalo.

 A gole e dua na turaga e Jiu ina dua na vanua e vakaraitaki tu kina na noda ivola e Mexico, qai tarogi rau na tacida tagane ke tiko e dua na ivola me baleta na mate. Erau tukuna vua ni sa oti na mekesini me baleta na mate, sa tiko ga na mekesini me baleta na gauna se bera mai. E taura na ligai tacida tagane na turaga ya qai kaya: “Au sega ni via kila e dua na ka me baleta na gauna se bera mai. Au vinakata ga meu vakamatei au.” Ni tukuna oti qori, e sorova na tagi. Erau taroga sara na tacida se cava e va kina ya na nona rai. E kaya ena mamakeukeu: “E se qai mate ga na luvequ tagane.” Erau vakaraitaka vua na wase 7 ni ivola Kaya na iVolatabu, rau qai wilika na rua na parakaravu ena ulutaga lailai “Ni Mate na Wekada Voleka.” Oti ratou raica sara na itinitini ni wase e vakamacalataki kina na inuinui me baleti ira era sa takali. E uqeti koya dina na turaga ya na ka e rogoca, e baci taura na ligana na tacida tagane qai taroga: “E dina ya?” Erau vakadeitaka vua na tacida ni na vakayacora dina o Jiova na nona yalayala. Sa qai taroga na turaga ya: “Na cava meu cakava meu sotavi luvequ tale kina?” Eratou veivosakitaka sara me ratou lai sota ena nona vale. Ni rau yaco yani na tacida tagane, sa wawa tu na turaga ya me sa tekivu vulica na iVolatabu.

E kaya e dua na ivakatawa dauveilakoyaki a veivuke ena kena tauyavutaki na porokaramu ni vunau e matanalevu e Niu Yoka: “Sa vakalougatataka dina o Jiova na porokaramu ni vunau ena matanalevu ena siti! E vuavuaivinaka sara na iwalewale ni vunau qo nira rogoca rawa kina na itukutuku vinaka e vica vata na udolu. Era sa vukei tale ga kina ‘na sipi era yali tu’ mera lesu ina qelenisipi, qori o ira era malumalumu tu vakayalo kei ira na vakasivoi.”—Isikeli 34:15, 16.