ITUKUTUKU NI VUNAU ENA YABAKI SA OTI
Vakatotolotaki na Tara Vale ni Soqoni
E VEIVAKADRUKAI dina nona vakatotolotaka tiko o Jiova na tete ni sokalou dina e veiyasa i vuravura! (Aisea 60:22) E vinakati gona me tara se vakavinakataki e rauta ni 13,000 na Vale ni Soqoni e veiyasa i vuravura.
E vakayacora na veiveisau na iLawalawa Dauvakatulewa ena tabana ni tarataravaki me vakatotolotaka na cakacaka, me vakabula ilavo tale ga. Dua na ka na sasaga e cakava tiko na Worldwide Design/Construction Department (WDC) se na Tabana ni Tarataravaki e Veiyasa i Vuravura. E tiko na tabana vou qori ena valenivolavola liu e Brooklyn, Niu Yoka. E tuvanaka na tara kei na vakavinakataki ni Vale ni Soqoni kei na valenivolavola ni tabana ena veiyasa i vuravura. Dua tale na tabana e vakatokai me Regional Design/Construction Department (RDC) se Tabana ni Tarataravaki ena Dua na Wase kei Vuravura. E tiko na tabana qori ena valenivolavola e Ositerelia, Urope, Sauca Aferika, kei Merika, ra qai qarava na tarataravaki ena nodra dui wasewase. E dau vaqara na sala me vakatotolotaki kina na tarataravaki, me vakabula ilavo tale ga. E vakarautaka na RDC na vuli ina veivalenivolavola ni tabana me rawa ni vinaka tu ga na ituvaki ni vale e taukena na isoqosoqo ena dui vanua era qarava. E tiko ena noda valenivolavola kece na Local Design/Construction Department (LDC) se Tarataravaki e Qarava na Valenivolavola ni Tabana. Na tabana qori e qarava na tara se vakavinakataki ni Vale ni Soqoni se noda Vale ni Soqo Lelevu.
A vakayacori e dua na bose ena Janueri 2015, qai vakamacalataki kina na ituvatuva vou ni kena lalawataki, tara, se vakavinakataki na Vale ni Soqoni. Era sarava ena vidio na bose qori na qase ni ivavakoso kece mai Merika. Qo na macala ni bose.
-
Tarataravaki: Na itaratara ni vale kei na kena iyaya ena vakatau ena ituvaki ni vanua, qai muri na idusidusi mai na Tabana ni Tabaivola ni iLawalawa Dauvakatulewa. Ena lailai na ka me vakavinakataki, e rawa ni dede na kena vakayagataki tiko na vale, e bula tale ga kina na ilavo.
-
Kena vakavinakataki: Era na vakavulici eso ena ivavakoso mera qarava na vale ni noda sokalou, me rawa ni vakayagataki ena loma ni dua na gauna balavu.
E cakacaka levu na tara kei na vakavinakataki ni vale ni soqoni se valenivolavola ni tabana. Ia na nodra cakacaka vata na tamata ni Kalou ena vakatotolotaka na cakacaka, ena vakayagataki vinaka tale ga kina na cau.
