“AU SEGA ni tukuna rawa na levu ni noqu marau,” e kaya e dua na tacida yalewa a tiko ena vakatabui ni valenivolavola ni tabana e Madagascar ena Vakarauwai, 24 Janueri, 2015. E marau na tacida yalewa qori kei na 583 tale na vulagi nira raica na icili vou e 19 na kena rumu, na valenikana levu, kei na valenikuro vou. E vakalevutaki na ofisi ni Tabana ni Cakacaka, Veika Vakailavo, kei na Tarataravaki e Qarava na Valenivolavola ni Tabana. E vakarautaki na rumu vou ni Tabana ni Katokatoni kei na Vosa Vagalu, sa dua tale ga na tabana vou e qarava na nodra ivola na mataboko. Era rogoca e liu na vulagi na veika sa rawati ena cakacaka vakavunau e Madagascar. Oti era qai rogoca na ivunau e vakatabui kina na valenivolavola vou, qai vunau  o Mark Sanderson e lewe ni iLawalawa Dauvakatulewa.

Dua na ka nodra lomavakacegu na tacida e Idonisia ni sa lutu na wai ni waluvu e Jakarta. Sa na rawa ni vakatabui na valenivolavola vou ni tabana ena 14 Feperueri, 2015. Sa tiko ena gauna qo na valenivolavola ena dua na tabavale ena vale taba 42, kei na dua tale na vale taba 12 e toka voleka ga. E levu tale na tabana e Peceli era tiko ena so tale na vale. A vunau o Anthony Morris e lewe ni iLawalawa Dauvakatulewa me vakatabui kina na valenivolavola vou ni tabana. Ena siga tarava, era lai rogoca na nona ivunau e le 15,257 ena dua na rara ni qito, na kena iulutaga “Gumatua Tiko ga ena Cakacaka Vinaka.” E le 11,189 era sarava na porokaramu qori ena vidio ena 41 na vanua. Qori na nodra soqo levu duadua na tamata i Jiova e Idonisia. E kaya o Ronald Jacka, dua vei ira na isevu ni daukaulotu e Idonisia: “A se 26 ga na dautukutuku ena vanua taucoko niu yaco mai ena 1951. Ia sa sivia na le 26,000 era tiko ena soqo lavotaki qo. Sa vakalougatataki ira dina na nona tamata e Idonisia o Jiova!”