A TOVOLEI ena 6 Okotova, 2014, na isevu ni porokaramu vakavalagi ni tivi e vakatokai na JW Broadcasting. * Tekivu ena Okosita 2015, sa vakarautaki na porokaramu qo ena sivia na 70 na vosa mera marautaka e levu tale na mataveitacini ra qai vakaukauataki vakayalo. Sa ra vakavinavinakataka e levu mai na veiyasa i vuravura na porokaramu totoka qo. Ia na cava soti e okati ena kena vakarautaki na JW Broadcasting?

A laurai e dua na vanua veiganiti e rawa ni vakayagataki ena valenivolavola liu ni iVakadinadina i Jiova ena 30 Columbia Heights, Brooklyn, Niu Yoka. E vagalalataki  na vanua qori ena loma ga ni dua na macawa, tekivu vakarautaki sara me caka kina na porokaramu. Gauna vata qori ra vakarautaka na tacida era kenadau na rumu ni kakaburaki me rairai matau qai maqosa me vaka na kena e vakayagataki ena gauna qo. Dua na ka nodra gumatua na tacida mai na veiyasa i Merika ena kena vakarautaki na vanua ni kakaburaki ena dua ga na gauna lekaleka. Na vakadidike e dau taura e vica vata na vula e vakayacori ga ena vica na siga, ra qai yavala totolo na tabana ni volivoli ena vaqarai ni iyaya kece e gadrevi.

Dua na ka na levu ni wa ni livaliva e vakayagataki, era vakatovolei tale ga na misini kece ke ra cakacaka vinaka tiko. Gauna vata qori sa ra katona na tacida na ivakatagi ni JW Broadcasting ena tabana ni vidio e Patterson. Era veivuke kina na tacida era gole mai na veiyasa i vuravura. E vakarautaki sara na itukutuku me wiliki ena porokaramu, tuvanaki tale ga na vakatovotovo. Era cakacaka vakaukaua na tacida ena tabana ni vidio e Brooklyn, Patterson, Wallkill kei na so tale na vanua mai na veiyasa i vuravura ena katoni ni vidio me kaburaki. Ni sa tu kece na veika e gadrevi ena rumu ni kakaburaki, sa vakarautaki sara na porokaramu ni imatai ni vica na vula.

Ni tarogi e dua e kenadau ena kakaburaki ena tivi se dau vakacava na dede ni kena vakarautaki na vanua ni kakaburaki va qo, e kaya ni dau taura e dua veimama na yabaki. Ia era cakava rawa qori na tacida ena loma ga ni rua na vula!

Sa bau veiuqeti dina na veika sa rawati! E dau saravi vaka rua na milioni se sivia na porokaramu vou ni JW Broadcasting e vakaraitaki ena imatai ni Moniti e  veivula. Ia na kena porokaramu kece e dau saravi vaka tini na milioni e veivula.

E uqeti ira vakacava na tamata i Jiova na isolisoli vakayalo qo? Rogoca mada na ka era tukuna eso:

• “Dua dina na bogi marautaki ena noqu bula! Au sega ni tukuna rawa na noqu marau ni keirau sarava vakaveiwatini na porokaramu ni JW Broadcasting ni vula o Me 2015. Qo e dua na iloloma talei i Jiova. Keirau vakavinavinaka ina iLawalawa Dauvakatulewa kei ira na mataveitacini ena kena vakarautaki na isolisoli totoka vakayalo qo.”—Idonisia.

• “Levu na tacida era se sega vakadua ni bau rogoca ni vunau e dua na lewe ni iLawalawa Dauvakatulewa. Ia qo keimami sa rogoci ratou, keimami raici ratou tale ga. Keimami vakila dina ena gauna qo na neimami duavata kei na iLawalawa Dauvakatulewa kei ira na mataveitacini e vuravura raraba.”—Kenya.

• “E dau dredre niu sokalou vakavuvale kei rau na luvequ ni sega ni tiko ena dina o watiqu. Ia au raica ni sa bau yaga sara ga na JW Broadcasting. Au vakadeitaka ena porokaramu qo niu lewe ni dua na vuvale levu vakayalo, keitou uqeti tale ga kina vakaveitinani. Qo e dua dina na veivakalougatataki i Jiova.”—Peritania.

• “Keimami sa taleitaka dina na JW Broadcasting! E saumi sara ga na neimami masu ni vakarautaki na porokaramu  qo ena so tale na vosa. Sa veiuqeti dina na nomuni veikauaitaki kei na nomuni tokona ena yalo mamarau na sokalou vei Jiova. E vakadeitaka vei keimami na porokaramu ni tivi qo ni keimami lewe ni vuvale totoka i Jiova.”—Czech Republic.

• “E vakavolekati au sara ga vei Jiova na noqu rogoca ena noqu vosa na nodratou ivakamacala na lewe ni iLawalawa Dauvakatulewa.”—Brazil.

• “Sa 16 qo na yabaki noqu qaravi Jiova voli mai, au se vakila ga ena gauna au papitaiso kina na marau au vakila nikua. Raveitacini, vinaka vakalevu na JW Broadcasting.”—Brazil.

Ena veivuke i Jiova, eda nuidei ni na ivurevure tiko ga ni veivakalougatataki vakayalo na JW Broadcasting vei ira na nona tamata. Qori ena vakacaucautaki, ena vakalagilagi tale ga kina o Jiova.