EDA vakabauta na lotu vaKarisito dina ni o Jiova e ivurevure ni rarama vakayalo. Qori na vuna eda dau masuta kina vagumatua me tuberi qai dusimaki keda na Kalou ena nona ‘rarama kei na dina.’ (Same 43:3) E butobuto tu vakayalo o vuravura, ia e vakararamataki ira tu ga na nona tamata na Kalou dina. Sa rauta me “vaka na rarama ni matanisiga” na nodra sala, “e serau cake tiko na kena rarama me yacova na sigalevu.” (Vkai. 4:18) E serau cake tiko ga na veivakararamataki i Jiova ena ituvatuva ni nona isoqosoqo, ivakavuvuli, kei na nodra itovo na nona tamata. Na cava eso na ka e se qai vakamatatataki ga qo vei keda?