Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IDONISIA

Valenivolavola Vou ni Tabana

Valenivolavola Vou ni Tabana

Valenivolavola ena ika31 ni tabavale

Ena 2008, sa 21,699 na dautukutuku e Idonisia. Sa sega ni veirauti na valenivolavola ni tabana, e yawa tale ga na vanua e tiko kina ni se tara sara ena gauna ni vakatatabu. Kena ibalebale me sa dua na valenivolavola vou ni tabana e voleka i Jakarta.

Oti e rua na yabaki, era kunea na tacida e dua na vale e taba 42 ena loma ni korolevu o Jakarta. Era volia sara na ika31 ni tabavale qori. A voli tarava e dua na vale e taba  12 e toka voleka ga mera toki kina eso na lewenivuvale. A voli tale ga e dua na vale e taba lima me toki kina na tabana e qaravi ira na lewe i Peceli.

Vale taba 12 mera vakaicili kina na lewe i Peceli

Era cakacaka vata na tacida mai vanuatani kei na so na kabani ni taravale e Idonisia. Qori mera cakava na veiveisau e gadrevi ena valenivolavola kei na so tale na vale e voli. E kaya o Darren Berg a liutaka na cakacaka: “E vukei keimami tu ga o Jiova ena ituvaki dredre e sotavi. Kena ivakaraitaki, keitou via biuta e dua na misini vou me vakasavasavataka na wai. Ia era sega ni kila vinaka na vakailesilesi na misini qori, mani sega ni vakadonui neitou kerekere. A lai raica sara na vakailesilesi liu e dua na tacida tagane e idinia, qai vakamacalataka vua na ka keitou via cakava. E vakadonuya na vakailesilesi neitou kerekere, qai kaya ni nuitaki ira na tacida.”

“Sa sega tale ni dua na ka me vunitaki. Era sa kilai keda na iVakadinadina i Jiova na lewenivanua. Era kila tale ga ni na dei noda cakacaka ena vanua qo”

A vakatabui na valenivolavola vou ni tabana ena 14 Feperueri, 2015, qai vunau kina o Anthony Morris III e lewe ni iLawalawa Dauvakatulewa. E kaya o Vincent Witanto Ipikkusuma e lewe ni Komiti ni Tabana: “Keimami sa mai maliwai ira tu qo na veikabani lelevu ena dua na vanua rogo e Idonisia. Sa sega tale ni dua na ka me vunitaki. Era sa kilai keda na iVakadinadina i Jiova na lewenivanua. Era kila tale ga ni na dei noda cakacaka ena vanua qo.”

Lewe ni Komiti ni Tabana, mai na mawi ina matau: Budi Sentosa Lim, Vincent Witanto Ipikkusuma, Lothar Mihank, Hideyuki Motoi

“Kamikamica na Vunau Eke!”

Era toki i Idonisia ena vica na yabaki sa oti e levu na tacida mai na veiyasa i vuravura. E kaya o Lothar Mihank:  “E vakilai dina na yaga ni nodra toki mai eso mera mai veiqaravi ena vanua e vinakati vakalevu kina na veivuke, me vaka na neimami vanua. Na nodra kila, matua vakayalo, kei na gugumatua e yaga vakalevu ena ivavakoso era lewena. E uqeti ira na mataveitacini eke mera vakamareqeta na nodra lewe ni mataveitacini e vuravura raraba.” Na cava era toki kina? E bau dua na kena yaga vei ira? Raica mada na ka era tukuna eso.

Veiqaravi ena Vanua e Vinakati Vakalevu Kina na Veivuke

1. Janine kei Dan Moore

2. Mandy kei Stuart Williams

3. Casey kei Jason Gibbs

4. Mari (e liu, ena imatau) kei Takahiro Akiyama (e muri, ena imatau)

Erau kaya o Jason kei Casey Gibbs mai Merika: “Keirau vakadikeva ena iVolaniyabaki na ivakatautauvata ni lewenivanua kei na dautukutuku. Keirau raica ni o Idonisia e dua vei ira na vanua e vinakati vakalevu kina na dautukutuku. Era tukuna na neirau itokani era toki ina vanua e vinakati vakalevu kina na veivuke, ni vuavuaivinaka na yalava ni vunau e Idonisia. Keirau mani qiri ena valenivolavola ni tabana e Idonisia, sa qai tukuni mai me keirau gole i Bali. Ena yaga dina neirau lai veivuke ni se qai tekivu cakacakataki na yalava ni vosa vakavalagi e Idonisia. Keirau nanuma me dua ga na yabaki neirau lai veivuke, ia qo sa tolu sara na yabaki. E levu keirau vunau  kina era se sega ni sotavi keda na iVakadinadina i Jiova. E vuavuaivinaka dina na cakacaka vakaitalatala!”

Erau vakamacalataka e dua na veiwatini mai Ositerelia o Stuart kei Mandy Williams: “Keirau toki i Idonisia ni keirau via lai vukei ira na karamaca tu vakayalo. E levu na gonevuli ni univesiti keirau sotava e Malang, East Java, era vosa vakavalagi ra qai taleitaka na itukutuku vinaka. Era taleitaka tale ga na noda website! E wananavu dina na cakacaka vakavunau eke.”

Erau painia e Yogyakarta ena yanuyanu o Java o Takahiro kei Mari Akiyama, erau kaya: “Keirau sega ni bau rere ena neirau tiko voli eke me vaka keirau dau vakila mai Japani. Era veikauaitaki na lewenivanua, era vakaitovo tale ga. E levu era via kila tu na ka era vakabauta na veimatalotu tale eso, vakabibi o ira na itabagone. Ni keirau vunau e matanalevu ena dua na siga, keirau solia rawa e rauta ni 2,600 na mekesini ena loma ga ni lima na aua.”

Erau kaya o Dan kei Janine Moore, dua na veiwatini erau sa dua toka na itaba: “Era dau sosovi keirau na lewenivanua ni keirau lai vunau. Ni keirau matadredredre vei ira, era dredre tale ga mai. Era taleitaka na neimami veitalanoa nira via kila e levu na ka. Ni saumi nodra vakatataro, dua na ka nodra marau. Eso era dau kerea sara ga mera vola na usutu vakaivolatabu keimami veitalanoataka. Dua na ka nodra qoroya na ivakasala vuku ena iVolatabu. Keirau sa mai dua na yabaki eke, keirau veivutuni ga ni keirau sega ni lako totolo mai. Keirau vaqara voli e dua na vanua era se sega ni kilai Jiova kina e levu, keirau sa kunea na vanua qori!”

Erau lai daukaulotu e Idonisia ena 2009 o Misja kei Kristina Beerens, qo rau sa veisiko tiko ena veivavakoso. Erau kaya: “E vuavuaivinaka mada ga na vunau ena  yanuyanu o Madura e East Java. Qori e dua na vanua e Idonisia era vakaitikotiko kina na Musolomani kaukaua. Nira vakelea nodra motoka na lewenivanua mera kerea na mekesini, era dau kaya: ‘Au Musolomani, ia au taleitaka nomuni mekesini. Rawa niu kauta tale ga nodra mekesini na noqu itokani?’ E kamikamica dina na vunau eke!”

Matua na Were me Tamusuki

Ni yaco yani e Jakarta o Frank Rice ena 1931, sa rauta ni 60,000,000 na lewe i Idonisia. Nikua, sa voleka ni 260,000,000, na kedra iwiliwili na lewenivanua. Sa rauta me ikava ni matanitu e vuravura e levu duadua na kena lewenivanua o Idonisia.

 Era marautaka tiko na tacida e Idonisia na tubu vakasakiti. Mai na le tini ga na tacida yalodina era bula mai na iKarua ni iValu Levu ena 1946, nikua sa sivia na 26,000 na levu ni dautukutuku. E laurai votu e keri na veivakalougatataki i Jiova! Ni vakasamataki na le 55,864 era tiko ena iVakananumi ni 2015, e namaki me na rawati e levu tale na ka totoka e Idonisia.

A kaya o Jisu: “Io, e levu sara na ka me tamusuki, ia era le lailai na tamata cakacaka. O koya gona, dou kerea na Turaga ni tatamusuki me tala mai eso tale na tamata cakacaka ina nona tatamusuki.” (Maciu 9:37, 38) Era duavata kei na vosa qori na tacida e Idonisia. Era vakadeitaka mera gugumatua tiko ga ni vakarokorokotaka na yaca i Jiova ena nodra vanua.—Aisea 24:15.