Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IDONISIA

Painia Yaloqaqa

André Elias

Painia Yaloqaqa
  • SUCU 1915

  • PAPITAISO 1940

  • KENA ITUKUTUKU Dua na painia yaloqaqa, e dei tu ga ni vakatarogi qai vakarerei.

ERAU kacivi ena iKarua ni iValu Levu o Brother Elias kei na watina o Josephine ina nodra itikotiko liu na yamata ni Japani e Sukabumi, West Java. E vakatarogi e liu o André, qai veitaravitaki vua na taro. “O cei o ira na iVakadinadina i Jiova? O dau saqata na matanitu o Japani? O dua na yamata?”

E sauma o André: “Keirau dauveiqaravi ni Kalou Kaukaua Duadua, e sega tale ga na neirau cala.” E taura mai na nodra iliuliu na yamata ni Japani na iseleiwau e lili toka e lalaga qai laveta cake.

E taroga ena cudru: “Vakacava keu vakamatei iko sara ga qo?” E vakacuvara na uluna ena desi o André qai masu lo. A vakanomodi mada vakalailai, oti sa qai katuvu na dredre. E kaya na iliuliu: “Dua na ka nomu yaloqaqa!” E kacivi sara o Josephine. Ni tautauvata na nodrau itukutuku  kei André, e kaya na iliuliu: “Drau sega ni yamata. Drau lako!”

Oti e vica na vula, a vesu o André nira beitaki koya na ‘tacina vakailasu.’ (2 Kor. 11:26) E dau kania na ivovo ni kakana mai na isalasalaniwai ena rumu e vesu tu kina, ya sara ga na ka e vakabulai koya voli. E guce nodra sasaga na ovisa me tawayalodina o André. Ni veisiko yani o Josephine ena dua na siga, e vakasolokakanataka vua o André: “Kua ni leqa. Se ra mani vakamatei au se sereki au, au na yalodina tiko ga vei Jiova. Sa rawa ga nira kauti au matemate eke, ia au na sega ni cakitaka noqu vakabauta.”

Oti e ono na vula e valeniveivesu, e rairai ina Mataveilewai Cecere e Jakarta o André, sa qai sereki.

A vakatabuya tale nodra cakacaka na tacida na matanitu o Idonisia ni oti e 30 vakacaca na yabaki. E kacivi André sara ina nona ofisi na loya ni matanitu e Manado, North Sulawesi, qai taroga: “O kila ni sa vakatabui na cakacaka ni iVakadinadina i Jiova?”

“Io,” e sauma o André.

E taroga na loya: “Vakacava o sa na veisautaka na nomu lotu?”

E toso yani e liu o André qai tavia na serena. E kaya: “O rawa ni kauta mai tuba na utoqu, o na sega ga ni veisautaka na noqu lotu.”

E tukuna vei André na loya ni matanitu me lako, qai sega ni vakasosani koya tale.

A takali ena 2000 o André ni sa yabaki 85, e rauta ni 60 na yabaki na nona gumatua voli ena cakacaka vakapainia.