Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IDONISIA

Vakatakilai ena Doudou na Yaca i Jiova

Vakatakilai ena Doudou na Yaca i Jiova

Ena veiyabaki e vakatabui tu kina na cakacaka e Idonisia, era muria voli na mataveitacini na ivakasala i Jisu mera “qaseqase . . . me vaka na gata qai maloku me vaka na ruve.” (Maciu 10:16) Ia qo ni sa laveti na vakatatabu, e dodonu mera sa vulica na tacida na sala mera vunau kina “ena doudou.”—Caka. 4:31.

E laurai nira dau tu suka eso na mataveitacini mera vunau e veivale. Era caka veisikovi lesu ga kei na vuli iVolatabu. Eso tale era sega ni via vosa vei ira na Musolomani. E levu era tukuna ga nira lotu vaKarisito, sega ni iVakadinadina i Jiova. Era vakayagataka tale ga na iVolatabu ni lotu ni Veivanua vaKarisito, sega ni Vakadewa ni Vuravura Vou ena vosa vakaIdonisia. * Eso era sega ni doudou na veisoliyaka na ivola vakaivolatabu.

Eso na ivakarau qori a dau muri tu ena gauna ni vakatatabu. Eso tale e lakovata kei na ivalavala vakavanua e Idonisia. Qori mera dau vakamalumalumu me kua kina na veivala, era dau qaqarauni tale ga vakasivia. Ena vakadodonutaki vakacava na nodra rai na mataveitacini?

A vakayagataki ira na tagane matua vakayalo o Jiova mera veivakasalataki vakayalololoma. (Efeso 4:11, 12) Kena ivakaraitaki, a veisiko yani ena 2010 o Stephen Lett e lewe ni iLawalawa Dauvakatulewa. A uqeti ira na mataveitacini mera vakacerecerea na yaca ni Kalou. Qori ena nodra doudou ni vakayagataka na Vakadewa ni Vuravura Vou ena cakacaka vakaitalatala. E kaya e dua na daukaulotu o Misja Beerens: “E tarai ira sara ga e levu na mataveitacini na ivunau i Brother Lett. Era sa qai raica ni bibi mera  vakaraitaka nira iVakadinadina i Jiova ra qai vakatakila ena doudou na Vosa ni Kalou.”

Era nanuma na Musolomani e Idonisia nida lotu ni Veivanua vaKarisito tale ga na iVakadinadina i Jiova. E yaga dina na vakatutu e qai tabaki ena itabataba vakaIdonisia ni Cakacaka Vakaitalatala: “E vinaka mo vakaraitaka ni o dua na iVakadinadina i Jiova ni se qai tekivu ga na nomu ivakamacala. . . . E ka dokai meda matataki Jiova, eda via vakatakila tale ga na yacana kei na nona inaki ena noda yalava ni vunau!” E kaya o Shinsuke Kawamoto, e veiqaravi tiko ena valenivolavola ni tabana e Idonisia: “E vuavuaivinaka na neimami vosa vakadodonu, vakayalovinaka tale ga. Levu na ka era dau lomatarotarotaka tu na Musolomani me baleti keda na iVakadinadina i Jiova. Era via kila na veika eda duatani kina. Keimami raica ni gauna veiganiti qori me keimami vunau vakavinaka kina vei ira.”

Era uqeti tale ga na dautukutuku mera veisoliyaka vakalevu na Vale ni Vakatawa kei na Yadra! E kaya o Lothar Mihank na Kodineita ni Komiti ni Tabana: “E bibi mera wilika na noda mekesini na lewenivanua me rawa nira kilai keda. Na mekesini e vakamalumutaka na ‘qele,’ e rawa nira taleitaka kina na ka dina na lewenivanua. Ke da veisoliyaka vakalevu, e rawa nira mai kilai Jiova e levu tale.”

Yaga na Vunau e Matanalevu

E rua na iwalewale vou ni vunau e vakadonuya na iLawalawa Dauvakatulewa me tekivuna na valenivolavola ni tabana e Idonisia ena 2013. Qori na vunau lavotaki e matanalevu ena siti, kei na vunau e matanalevu ena yalava ni ivavakoso. E marautaki na iwalewale ni vunau qori, era sa rogoca rawa kina e levu na lewenivanua na itukutuku vinaka.

A tekivu e West Jakarta na vunau e matanalevu ena siti, qori ena dua na vanua ni volitaki iyaya vakalivaliva. Ena  dua na gauna e muri, era tuvanaka tale ga na veivavakoso na vunau e matanalevu ena nodra yalava. Oti e dua na yabaki, sa muri na iwalewale ni vunau qo ena sivia na 400 na vanua e Idonisia. Na cava e rawati kina?

E kaya o Yusak Uniplaita, dua na qase ni ivavakoso e Jakarta: “Ni se bera ni tekivu na vunau e matanalevu, a dau kerea e veivula na ivavakoso e 1,200 na mekesini. Ia ni oti e ono na vula, sa kerei e 6,000 na mekesini. Ena gauna qo, sa kerei tiko e veivula e 8,000 na mekesini. Keimami dau veisoliyaka tale ga vakalevu na ivola kei na brochure.” Eratou biuta ena tolu na vanua na qiqi ni ivola e dua na ilala painia e Medan, North Sumatra. E soli rawa ena imatai ni vula e 115 na ivola, kei na 1,800 na mekesini. Oti e rua na vula, era veisoliyaka e 60 na painia ena vitu na vanua e sivia na 1,200 na ivola, kei na 12,400 na mekesini. E kaya e dua na daukaulotu o Jesse Clark: “Dua na ka nodra marautaka na mataveitacini na iwalewale ni vunau qo, qai vakadinadinataki ni vuavuaivinaka na yalava e Idonisia. Sa na iwalewale dei ni vunau eke na vunau e matanalevu!”

Vosa e Tara na Lomadra

O Idonisia e dua vei ira na vanua e vuravura e levu duadua na kena vosa. * E levu era vosa vakaIdonisia, qori na vosa e vakayagataki raraba. E levu tale ga era vosataka na nodra vosanivanua, na vosa e tara na lomadra.

Timi ni vakadewa ena vosa vakaBatak-Toba e North Sumatra

Ni duidui vosa na yalava ni vunau e Idonisia, e sasaga ena 2012 na valenivolavola ni tabana me kila na ka e vinakati ena yalava. E kaya o Tom Van Leemputten: “Keitou tekivu vakadewa ena 12 na vosanivanua era vosataka e rauta ni le 120 na milioni. Nira raica na dauvakadewa ena vosa vakaJava na imatai ni tikidua e vakadewataki ena vosa ya, era tagi sara ga ena levu ni nodra marau.  Io, sa vakarautaki sara ga ena nodra vosa na kakana vakayalo!”

E caka tu ga vakaIdonisia na soqoni ena levu na ivavakoso, ena veivanua mada ga era vosataka kina e levu na nodra vosanivanua. E nanuma lesu o Lothar Mihank: “Keirau tiko kei na watiqu o Carmen ena dua na soqo siga rua ena 2013, ena yanuyanu o Nias e North Sumatra. Era tiko ena soqo qori e le 400, e levu vei ira era vosa vakaNias. Ia e vakaIdonisia na ivunau kece. Ni keimami veitalanoa oti kei ira na vunau, sa qai tukuni vei ira na vakarorogo ni na vakaNias na porokaramu ena siga tarava. Era osota yani na olo ena siga ya e sivia na le 600.” E tomana o Carmen: “E laurai nira vakarorogo vinaka sara ina porokaramu vakaNias o ira na tiko ena soqo, ni vakatauvatani kei na imatai ni siga a vakaIdonisia kina na ivunau kece.  Dua na ka nodra marau ni matata vinaka vei ira na ivunau vakaivolatabu era rogoca sara ga ena nodra vosa.”

Vukei vakayalo e dua na didivara

Era sa rawa ni “rogoca” tale ga na ka dina na didivara ena nodra vosa. Me tekivu mai na 2010, sa vakadewataki ena vosa vagalu ni Idonisia e vitu na brochure, kei na walu na tikidua. A tuvanaka tale ga na valenivolavola ni tabana e 24 na kalasi ni vuli vosa vagalu. Era vakavulici kina e sivia na 750 na dauvakadewa. Ena gauna qo, sa 23 tiko na ivavakoso kei na iwasewase lalai vagalu e Idonisia. Era vakacegui qai vukei kina vakayalo e rauta ni tolu na milioni na didivara.

Sa 37 tiko na timi ni vakadewa ena gauna qo e Idonisia. Era le 117 na dauvakadewa, e le 50 tale era veitokoni tiko ena tabana ni vakadewa ena 19 na vanua ena veiyasa i Idonisia.

^ para. 2 A sevutaki ena 1999 na iVolatabu taucoko na Vakadewa ni Vuravura Vou ena vosa vakaIdonisia. Era oga na dauvakadewa me vitu na yabaki ena kena vakarautaki na iVolatabu qori, qai caka tu na vakadewa ena gauna ni vakatatabu. Oti tale e vica na yabaki, a sevutaki ena vosa vakaIdonisia na rua na ivola ni Insight on the Scriptures kei na Watchtower Library ena CD-ROM. Dua dina na toso vakasakiti qori ena cakacaka ni vakadewa!

^ para. 2 E 707 na vosanivanua e Idonisia, o Papua Niu Kini e 838.