Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IDONISIA

Na Soqo Guiguilecavi Dredre

Na Soqo Guiguilecavi Dredre

ERA gole ina korolevu o Bandung, West Java ena 15-18 Okosita, 1963, e vica vata na drau na dautukutuku e Idonisia kei na le 122 mai vanuatani. Era lai tiko ena imatai ni soqo cokovata ni veimatanitu me vakayacori e Idonisia e kena usutu na “Everlasting Good News.”

Era sotava e levu na ituvaki dredre na mataveitacini ena nodra vakavakarau ina soqo qori. Kena ivakaraitaki, e veisau vakatolu na vanua ni soqo ena vuku ni kena marautaki e Idonisia na tugalala ni matanitu. Eso na tacida era veisautaka na nodra ituvatuva nira vakatubura ena 400 na pasede na vakailesilesi na isau ni vodovodo ni sa tubu na isau ni iyaya. E taubale me ono na siga e dua na tacida me lai tiko ena soqo. Era vosota na le vitusagavulu mai Sulawesi na oso ni waqa, na moce kei na dabe vakaca ena lima na siga era soko voli kina. Mera yaco rawa ga ina vanua ni soqo.

Era marau na mataveitacini e Idonisia nira sotavi ira na tacidra mai vanuatani, wili kina e rua na lewe ni ilawalawa dauvakatulewa, o Frederick Franz kei Grant Suiter. E kaya e dua na tacida tagane mai vanuatani: “Era mamarau qai matadredredre tu ga na mataveitacini eke.”

Era le 750 vakacaca na tiko ena soqo, ra qai papitaiso e le 34. E kaya o Ronald Jacka: “Oti na soqo vakairogorogo qori, era taura na dina e levu na tataleitaki. E uqeti ira tale ga na tacida e Idonisia mera gumatuataka sara na cakacaka ni Kalou.”

Vunau tiko o Ronald Jacka (matau) ena soqo ni 1963 e kena usutu “Everlasting Good News,” toka e yasana o koya e vakadewa