Ena 9 Julai, 1964, a vakalawataka na Tabana ni Lawa e Idonisia na isoqosoqo vakalawa era vakayagataka tiko na tacida ena gauna ya e vakatokai na Bible Students Association. Ia e vinakati mera lai rejisita na tacida ena Tabana ni Veika Vakalotu me rawa ni soli vei ira na galala ni sokalou. E dau soli ivakasala ina tabana qori e dua tale na tabana e qaravi ira na isoqosoqo lotu vaKarisito (Department of Christian Affairs). Era cakacaka tiko e keri na lotu Tawase era dau saqati ira na tacida.

E sotava e dua na tacida tagane na vakailesilesi e dau cakacaka vata kei na Minisita ni Veika Vakalotu. Erau sa qai kila e keri ni rau koro vata, e bula nodrau veitalanoa ni rau sa talia vanakoro. E vakamacalataka sara na tacida ni vakalatilati tiko ena nodra cakacaka na tabana e qaravi ira na isoqosoqo lotu vaKarisito. Sa qai veivosakitaka na vakailesilesi me ratou sota kei na minisita e tolu na tacida  tagane. E Musolomani na minisita, e turaga yalovinaka qai dauveikauaitaki. Ena 11 Me, 1968, e tukuna na minisita ni sa kilai vakalawa me dua na lotu na iVakadinadina i Jiova, qai tu vei ira na dodonu mera vunau.

E vakaraitaka tale ga na vakailesilesi ni na saga nodra ivolatara ni curuvanua na tacida daukaulotu mai vanuatani. Ena sega ni veitaratara tale ina tabana e qaravi ira na isoqosoqo lotu vaKarisito. Ena nona yalorawarawa na vakailesilesi qori me veivuke, era gole yani kina i Idonisia e 64 na daukaulotu ena vica na yabaki e tarava.

Ni yacova na 1968, era sa vunautaka na itukutuku vinaka e Idonisia taucoko e rauta ni 300 na daukaulotu kei na painia lavotaki, kei na sivia na 1,200 na dautukutuku. Era vakila na mataveitacini na yaga ni nodra veivakavulici na daukaulotu, e totolo kina na nodra toso vakayalo. E veiganiti tale ga na veivakavulici qori ni sa vakarau sotavi na veitusaqati kaukaua.

E saga tale ena 1974 na tabana e qarava na isoqosoqo lotu vaKarisito me vakatabui nodra cakacaka na tacida. E volavola na kena dairekita ina valenivolavola kece era vakarurugi ena Tabana ni Veika Vakalotu. E beitaki ira kina vakailasu na tacida ni sega tu ni kilai vakalawa nodra isoqosoqo lotu. E bukani ira na vakailesilesi mera vaqara iulubale mera tusaqati ira kina na mataveitacini. E levu na vakailesilesi era sega ni cakava na ka e kaya na dairekita. Ia eso tale era vakayagataka na ituvaki cava ga e rawa, me vakatabui kina na soqoni kei na vunau e veivale.

A lalawataka tiko ena gauna qori na Matabose ni Veimatalotu e Vuravura (World Council of Churches) me dua na soqo cokovata e Jakarta. Era kaya na Musolomani  ni qori e veivakacudrui qai veibeci. Ia e vakadaroya na soqo na Matabose ni sa qai kaukaua ga na veicati vakalotu. E vakavu veivosaki vakalevu na veivakalotutaki, ra qai lomaleqa e levu na daunipolitiki. Era raica na italatala ni gauna vinaka qori mera beitaki ira tale kina na tacida ena vuku ni nodra cakacaka vakavunau. Qori e vakavuna mera raici ira vakatani na tacida e levu tale na vakailesilesi.

Ni se kaukaua tiko ga na veicati vakalotu, e curuma o Idonisia ena Tiseba 1975 na vanua o East Timor (sa kilai nikua me o Timor-Leste), a qali tu e liu i Potukali. Oti e vitu na vula e taura vakaukaua o Idonisia na vanua o East Timor, sa qai bukana ga vakalevu qori na yalo ni boletaki vanua e Idonisia. Ia era tawaveitovaki tu ga ena veika vakapolitiki na tacida. Era sega ni via curu ina mataivalu se vakarokorokotaka na kuila. Qori e vakacudrui ira dina e levu na turaganivalu. (Maciu 4:10; Joni 18:36) Era sega tale ni wawa na italatala, era vakasaurarataka sara ga na matanitu me cakava e dua na ka vei ira na mataveitacini. Era taura na italatala ena Tiseba 1976 na nodra “iloloma ni Kirisimasi,” ni kacivaka kina na matanitu ni sa vakatabui na cakacaka ni iVakadinadina i Jiova.