Era sega ni wele na mataveitacini ena valenivolavola ni tabana nira rogoca ni sa vakatabui na cakacaka. E kaya o Ronald Jacka: “E vaqarai eso na vanua e Jakarta me vunitaki kina na ivolatukutuku maroroi, na ivola, kei na ilavo ni valenivolavola ni tabana. E tokitaki tale ga ina dua na vanua vuni na valenivolavola ni tabana qai volitaki na vale a vakayagataki tu e liu.”

Era sega ni rere e levu na mataveitacini e Idonisia ra qai gugumatua tiko ga. Era nuitaki Jiova ena ituvaki dredre kece era sotava ni bera na vakatatabu. Ia ka ni rarawa nira vakatulewa cala eso na mataveitacini. Kena ivakaraitaki, era sainitaka e vica na qase ni ivavakoso na veidinadinati mera sa kua ni vunau. Eso tale era vakaraitaka na yacadra na mataveitacini. Sa qai talai ira na tacida tagane matua na valenivolavola ni tabana mera lai veivakaukauataki ena ivavakoso, mera vukei ira era sa cakitaka nodra vakabauta. A sikovi Idonisia tale ga o John Booth, dua na lewe ni iLawalawa Dauvakatulewa, qai veivakasalataki me vaka e dua na tama dauloloma.

E vakadinadinataki ni vakaukauataki ira na nona tamata qai vakacegui ira na iVakatawa Levu o Jiova. (Isik. 34:15) Era sa qai gumatuataka ga na qase nodra itavi kei na nodra vakaitavi ena cakacaka vakaitalatala. Era vaqara na dautukutuku na sala vovou mera vunau kina ra qai qaseqasetaka nodra cakava qori. (Maciu 10:16) Era dau volia eso na iVolatabu sau rawarawa mai na Bible Society e Idonisia mera veisoliyaka e veivale. Nira solia, era na maqosataka nodra okata kina na itukutuku ni Matanitu  ni Kalou. Eso tale na tacida era kauta laivi mai na noda ivola na tabana e tiko kina na veika vakalawa e vauca na kena tabaki ra qai veisoliyaka vei ira na tataleitaki. E levu na painia era muria nodra ivakaraitaki na tacidra ena veigauna sa oti, era dau cakava eso na ka me nanumi ga nira volivolitaki ena gauna era lai vunau kina e veivale.

Dua tale na ivadi vou e vakayagataka ena 1977 na Tabana ni Veika Vakalotu. E sega ni via vakavoutaka na nodra ivolatara ni curuvanua na tacida daukaulotu mai vanuatani. Era mani lesi ina so tale na vanua e levu na daukaulotu. * E nanuma lesu o Norbert Häusler a daukaulotu voli  kei na watina o Margarete, e Manado, North Sulawesi: “Era lai veitalatala yani ena raraniwaqavuka e levu na mataveitacini. Ni keirau yaco ena ikabakaba ni waqavuka keirau qai raivuki, era yaloyalo ra qai kailavaka mai: ‘Vinaka. Vinaka na mai veiqaravi eke.’ Keirau sorova na tagi ni keirau curu i loma ni waqavuka.”

E tete ena veiyasa i Idonisia na itukutuku ni vakatatabu. E tukuna sara na isoqosoqo e qaravi ira na lotu vaKarisito, mera tukutuku na lewenilotu vei ira na vakailesilesi ke ra kila e dua na ka me baleta nodra cakacaka na tacida. Qori e vakavuna mera vesu e levu na mataveitacini, e caka tale ga ena levu na yanuyanu na veivaqaqai.

E kacivi ira e 23 na mataveitacini e Waingapu, ena yanuyanu o Sumba na turaganivalu, mera lai sainitaka e dua na ivola ena keba ni mataivalu nira sa cakitaka nodra vakabauta. Nira sega ni via cakava qori na tacida, e vakarota na turaganivalu mera lesu yani ena keba ena siga tarava. Era taubaletaka e 14 na kilomita ena ilakolako qori.

Era kacivi yadudua vua na turaganivalu ena mataka tarava na mataveitacini, qai tukuni mera sainitaka na ivola. O koya e sega ni via saini e mokulaki ena kau vakavotona. Era sega ni vakilai ira eso na tacida ena nodra veimoku vakalialia na sotia. Ni caka tiko na ivakarau vakaloloma vua e dua, era wawa tu na vo ni mataveitacini. E kacivi sara e dua na tacida cauravou o Mone Kele, dua na ka nodra rarawa na kena vo nira raica ni sa volavola. Ia e katakata na turaganivalu ni a vola o Mone: “Au na iVakadinadina i Jiova tiko ga!” E mokulaki o Mone qai tini e valenibula ena vuku ni nona mavoa. Ia e yalodina tiko ga vei Jiova.

 E 11 na siga nona saga tiko na turaganivalu mera tawayalodina na tacida. Sa qai vakarota mera lai duri tu ena siga taucoko e tuba, ni warumisa sara tu ga na katakata ni siga. E vakasaurarataki ira mera qasi me vica vata na kilomita, mera colata na ka bibi ra qai ciciva eso na vanua yawa. E dau biuta ena nodra itagitagi na isele qai tukuna mera vakarokorokotaka na kuila. Nira sega ni via cakava na mataveitacini, e dau vakarota na turaganivalu mera mokulaki tale.

Era veinanuyaka ena veimataka na mataveitacini se itotogi cava sa waraki ira tu mai na keba. Era dau masu vata, era veivakayaloqaqataki mera yalodina tiko ga. Nira lesu i vale ena veibogi, era mavoa qai dradra na yagodra. Ia era marau nira yalodina tu ga vei Jiova.

Nira rogoca na tacida ena valenivolavola ni tabana na nodra vakalolomataki na tacida, era vakaraitaka sara nodra kudru vua na turaganivalu e Waingapu, turaganivalu e Timor, turaganivalu e Bali, kei na nodra iliuliu levu e Jakarta, vei ira tale ga eso era vakaitutu ena matanitu. E madua na turaganivalu e Waingapu ni sa kilai raraba e Idonisia na nona veivakalolomataki, mani tinia na nona tusaqati ira na mataveitacini.

Era vesu, vaqaqai, qai vakalolomataki e levu na tacida ena veiyasa i Idonisia. E nanuma lesu o Bill Perrie: “E qeqera na batidra eso na mataveitacini ena kaukaua ni ka e caka vei ira. Ke dua vei ira na tacida e se tiko kece na batina, era dau veiwalitaka na kena vo: ‘O se ka vou eke? Se o  sa cakitaka nomu vakabauta?’ Era sotava na veika rarawa na tacida, ia era marau qai gugumatua tiko ga ena nodra qaravi Jiova.”

Ena loma ni 13 na yabaki, era vesu e 93 na tacida qai rua na vula ina va na yabaki na kedra itotogi. Na ivakarau vakaloloma e caka vei ira sa qai vakaukauataki ira ga mera yalodina vei Jiova. Dua vei ira qori o Musa Rade, a vesu me walu na vula. Ni vakayaloqaqataki ira na mataveitacini ena nona yasayasa mera vunau tiko ga, e kaya: “Au vulica ena noqu tu e valeniveivesu meu nuitaki Jiova vakalevu. E vakaukauataki au tale ga vakayalo.” Sa rauta mera kaya eso era raica na veika e yaco: “O ira na iVakadinadina i Jiova era vaka na ivako. Na kaukaua ga ni nomu tukia, na kena dredre tale ga ni cavu.”