Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 IDONISIA

E Vakamareqeta na iYau Vakayalo

Thio Seng Bie

E Vakamareqeta na iYau Vakayalo
  • SUCU 1906

  • PAPITAISO 1937

  • KENA ITUKUTUKU Dua na qase ni ivavakoso yalodina a donuya na veiraravui vakaduikaikai.—Talanoataka na luvena yalewa o Thio Sioe Nio.

A YACO na tiko yavavala e West Java ena Me 1963 ra qai cati na lewenivanua mai Jaina era vakaitikotiko e kea. E ca sara na ituvaki e Sukabumi, na vanua keitou vakabisinisi tiko kina. Era curuma yani na neitou vale e dua na ilala dauvakacaca, wili kina eso keitou tiko veitikivi. Era vorolaka qai butakoca na neitou iyaya. Keitou sega ni cakava rawa e dua na ka ena levu ni neitou domobula.

Era mai veisiko eso nira sa biubiu na ilala dauvakacaca. Nira dabe toka e lomanivale kei tamaqu, e taura mai na nona iVolatabu vakaSunda, dolava, qai kaya vei ira ni sa parofisaitaki oti tu ni na yaco na leqa va qo. E vakamacalataka tale ga vei ira na inuinui totoka me baleta na Matanitu ni Kalou.

E sega ni bibi vei tamaqu na iyau vakavuravura. E dau tukuna vei keitou: “Me liu ga na veika vakayalo!” Ena vuku ni nona gugumatua, e ciqoma kina na ka dina o tinaqu, keitou na le ono na veitacini, o tukaqu sa yabaki 90, e levu tale ga na wekai keitou kei ira ena neitou yasayasa.