E macala ga ni na vakatitobutaka na nomu lomani Jiova na ivakamacala lekaleka qo ni ivakavuvuli vakaivolatabu. E bibi meda sasaga tiko ga me kua ni seavu na loloma qori. (1 Pita 2:2) Na nomu inuinui ni bula tawamudu e vakatau ena nomu toro voleka tiko ga vua na Kalou ni o vulica na nona Vosa.​—Wilika Joni 17:3; Juta 21.

Ni o vakalevutaka tiko ga na ka o kila me baleta na Kalou, ena dei na nomu vakabauta. Na vakabauta ena vukei iko mo vakamarautaka na Kalou. (Iperiu 11:1, 6) Ena uqeti iko mo veivutuni, mo cakava tale ga na veiveisau ena yaga ena nomu bula.​—Wilika Cakacaka 3:19.

E macala ga ni o na via wasea vei ira eso tale na veika o sa vulica—eda dau marautaka kece meda tukuna na itukutuku vinaka. Ni o vulica tiko ga na iVolatabu, o na kila na sala mo vakayagataka kina na iVolatabu ni o vakamacalataka na nomu vakabauti Jiova kei na itukutuku vinaka.​—Wilika Roma 10:13-15.

E levu era dau tekivu wasea na itukutuku vinaka vei ira na nodra itokani se na wekadra. Mo maqosataka na nomu cakava qori. Kua ni tukuna vei ira ni cala na nodra lotu, tukuna ga vei ira na ka e yalataka na Kalou. Mo nanuma tale ga ni dau uqeti ira vakalevu cake na tamata na nomu itovo vinaka mai na ka o tukuna.​—Wilika 2 Timoci 2:24, 25.

O na rawa ni matua vakayalo ni o vulica na Vosa ni Kalou. Ni toso na gauna, o rawa ni bucina e dua na veiwekani talei kei Jiova. O rawa sara ga ni lewe ni nona vuvale.​—Wilika 2 Korinica 6:18.

Ni o vulica tiko ga na Vosa ni Kalou, o na matua vakayalo. (Iperiu 5:13, 14) Kerea e dua na iVakadinadina i Jiova me vakavulici iko ena iVolatabu ni vakayagataki na ivola Na Cava Mada e Kaya na iVolatabu? Na levu ga ni nomu vulica na Vosa ni Kalou, na levu tale ga ni veika vinaka o na marautaka ena nomu bula.​—Wilika Same 1:1-3; 73:27, 28.

E vu mai vua na Kalou mamarau o Jiova na itukutuku vinaka. O rawa ni toro voleka vua ena nomu volekati ira na nona tamata. (Iperiu 10:24, 25) Ni o sasaga tiko ga mo vakamarautaki Jiova, o sa vinakata tiko na bula dina—na bula tawamudu. Na ka vinaka duadua o rawa ni cakava, oya mo toro voleka vua na Kalou.​—Wilika 1 Timoci 1:11; 6:19.