Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 LESONI 4

O Cei o Jisu Karisito?

O Cei o Jisu Karisito?

1. A tekivu vakacava na bula i Jisu?

Na itovo cava soti e vakavuna me torovi rawarawa o Jisu?​—MACIU 11:29; MARIKA 10:13-16.

O Jisu e sega ni vaka na tamata, a dua tu na kabula vakayalo mai lomalagi ni bera ni mai sucu e vuravura. (Joni 8:23) A imatai sara ga ni ibulibuli ni Kalou qai veivuke ena buli ni ka kece. Ni buli koya taudua sara ga o Jiova, e veiganiti kina me vakatokai me Luvena “duabau” na Kalou. (Joni 1:14) Na Kalou e vakayagataki Jisu me nona gusunivosa, oya na vuna e vakatokai tale ga kina “na Vosa.”​—Wilika Vosa Vakaibalebale 8:22, 23, 30; Kolosa 1:15, 16.

2. Na cava a mai bula kina e vuravura o Jisu?

A tala mai vuravura na Kalou na Luvena ni tokitaka nona bula mai lomalagi ina katonigone i Meri, e dua na goneyalewa Jiu. E sega gona ni vakataivi e dua na tama ena nona kunekunetaki o Jisu. (Luke 1:30-35) A mai bula e vuravura o Jisu (1) me vakavulica na ka dina me baleta na Kalou, (2) me vakaraitaka vei keda na sala meda vakayacora kina na loma ni Kalou ke da sotava mada ga na ituvaki dredre, (3) me solia tale ga nona bula uasivi me “ivoli.”​—Wilika Maciu 20:28.

3. Na cava e gadrevi kina na ivoli?

Na ivoli e dusia na ilavo e soli me isau ni nona sereki e dua me kua ni vakamatei. (Lako Yani 21:29, 30) E sega ni nona inaki taumada na Kalou me qase se mate na tamata. Eda kila vakacava? A tukuna na Kalou vei Atama ni na mate ke cakava na ka e vakatoka na iVolatabu me “ivalavala ca.” Ke sega gona ni valavala ca o Atama, ke a sega ni mate. (Vakatekivu 2:16, 17; 5:5) E tukuna na iVolatabu ni “curu” i vuravura na mate ena vuku i Atama. Sa qai vakadewa o  Atama vei ira nona kawa kece na ivalavala ca, kei na kena itotogi na mate. E gadrevi kina na ivoli me sereki keda mai na mate e vakadewa o Atama.​—Wilika Roma 5:12; 6:23.

O cei e rawa ni sauma na ivoli me sereki keda mai na mate? Nida mate eda sauma ga na noda ivalavala ca. E sega gona ni dua na tamata ivalavala ca ena rawa ni sauma na nodra ivalavala ca eso tale.​—Wilika Same 49:7-9.

4. Na cava a mate kina o Jisu?

E sega ni vakataki keda o Jisu baleta ni uasivi. A sega gona ni gadrevi me mate ena vuku ni nona ivalavala ca ni sega na nona cala. Ia a mate ena vuku ni nodra ivalavala ca eso tale. E vakasakiti na nona lomana na kawatamata na Kalou ni tala mai na Luvena me mate ena vukuda. E vakaraitaka tale ga o Jisu na nona lomani keda ni talairawarawa vei Tamana qai cabora na nona bula ena vuku ni noda ivalavala ca.​—Wilika Joni 3:16; Roma 5:18, 19.

Sarava na vidio Na Cava a Mate Kina o Jisu?

5. Na cava sa cakava tiko ena gauna qo o Jisu?

Ni se bula e vuravura o Jisu, a vakabulai ira na tauvimate, vakaturi ira na mate, qai vakacegui ira na rarawa. A vakaraitaka kina o Jisu na ka ena cakava ena gauna se bera mai vei ira na talairawarawa. (Maciu 15:30, 31; Joni 5:28) Ni mate o Jisu, a vakabulai koya na Kalou ena yago vakayalo. (1 Pita 3:18) A wawa toka ena ligaimatau ni Kalou me yacova na gauna e solia kina vua o Jiova na lewa vakatui me liutaka mai na vuravura taucoko. (Iperiu 10:12, 13) Sa veiliutaki tiko vakatui ena gauna qo o Jisu mai lomalagi ra qai kacivaka tiko na nona imuri e veiyasa i vuravura na itukutuku vinaka qori.​—Wilika Taniela 7:13, 14; Maciu 24:14.

Sa voleka sara me vakayagataka na nona lewa vakatui o Jisu me vakaotia kina na rarawa kece kei ira era vakavuna. O ira kece era vakabauti Jisu qai talairawarawa vua era na marautaka na bula ena parataisi e vuravura.​—Wilika Same 37:9-11.