Na Kalou dina e bulia na ka kece. E sega na nona ivakatekivu, e sega tale ga na nona ivakataotioti. (Same 90:2) E vu mai vua na itukutuku vinaka ena iVolatabu. (1 Timoci 1:11) E dodonu meda sokaloutaki koya duadua ga na Kalou ni buli keda.​—Wilika Vakatakila 4:11.

E sega ni dua e se raica na Kalou baleta ni yalo. Kena ibalebale e cecere sara vei ira na ka buli era tu e vuravura. (Joni 1:18; 4:24) Ia eda rawa ni kila na nona itovo ena veika a bulia. Kena ivakaraitaki, eda kila rawa na nona loloma kei na nona vuku nida raica na veimataqali vuata kei na senikau duiroka. Eda kila tale ga na nona kaukaua ena vakaitamera ni lomalagi kei na vuravura.​—Wilika Roma 1:20.

Eda rawa ni vulica e levu tale na itovo ni Kalou ena noda wilika na iVolatabu. Kena ivakaraitaki, e tukuna vei keda na ka e taleitaka na Kalou kei na ka e cata, na ka e dau cakava vei keda, kei na ka e dau cakava ni basika na duidui ituvaki.​—Wilika Same 103:7-10.

E tukuna o Jisu: “Tamai keimami mai lomalagi, me vakarokorokotaki na yacamuni.” (Maciu 6:9) E levu na kena icavuti na Kalou, ia e dua ga na yacana. Ni duidui na vosa, e duidui tale ga na kena icavucavuti. Ena vosa vakaViti, na yacana o “Jiova.”​—Wilika Same 83:18.

Sa kau laivi na yaca ni Kalou ena levu na iVolatabu, sa sosomitaki ena icavuti na Turaga se Kalou. Ia e voleka ni basika vaka7,000 na yaca ni Kalou ena gauna e volai kina na iVolatabu. A vakatakila o Jisu na yaca ni Kalou ni vakavulici ira eso tale me baleta na Kalou.​—Wilika Joni 17:26.

Sarava na vidio E Tiko na Yaca ni Kalou?

Nira rarawa tu e levu nikua, kena ibalebale beka qori ni sega ni kauaitaki keda na Kalou o Jiova? Era tukuna eso ni vakararawataki keda na Kalou me vakatovolei keda kina, ia e sega ni dina qori.​—Wilika Jemesa 1:13.

E solia vei keda na Kalou na galala ni vakatulewa. Eda vakavinavinaka ni sega ni vakasaurarataki keda meda qaravi koya. (Josua 24:15) Ia era digia e levu mera cakava na ka ca vei ira eso tale, qori e sa qai levu ga kina na rarawa. E rarawa sara ga o Jiova ni raica na veika tawadodonu qori.​—Wilika Vakatekivu 6:5, 6.

E dau kauaitaki keda na Kalou o Jiova. E vinakata meda marautaka na bula. Sa voleka na gauna me kauta laivi kina na rarawa kei ira na vakavuna tiko. Ia ena gauna mada ga qo, e tiko na vuna vinaka e vakatara tiko kina vakalekaleka me yaco na ka rarawa. Eda na qai raica ena Lesoni 8 na vuna e cakava kina qori.​—Wilika 2 Pita 2:9; 3:7, 13.

E sureti keda o Jiova meda toro voleka vua ena noda vosa vua ena masu. E kauaitaki keda yadudua. (Same 65:2; 145:18) E yalorawarawa me veivosoti. E marautaka noda sasaga meda vakamarautaki koya ke sega ni rawa mada ga ena so na gauna. E rawa gona nida veiwekani voleka kei na Kalou, dina ga nida ivalavala ca.​—Wilika Same 103:12-14; Jemesa 4:8.

Ni solia vei keda na bula o Jiova, na noda lomani koya e dodonu me uasivia na noda lomana e dua tale. (Marika 12:30) Eda na qai veivolekati sara kei na Kalou nida vakaraitaka na noda lomani koya ena noda vulica e levu tale na ka me baleti koya da qai cakava na ka e tukuna.​—Wilika 1 Timoci 2:4; 1 Joni 5:3.