LESONI 10
O na Kila Vakacava na Sokalou Dina?
1. E dua ga na lotu dina?
“Ni qarauni kemuni vei ira na parofita lasu.”—MACIU 7:15.
E dua ga na lotu a vakavulici ratou kina na nona imuri o Jisu, oya na lotu dina. Na lotu qori e vaka na sala e basika ina bula tawamudu. E tukuna o Jisu ni ‘le lailai ga era sa kunea’ tiko na sala qori. (Maciu 7:14) Na Kalou e vakadonuya ga na sokalou e yavutaki ena ka dina ena nona Vosa. O ira kece na dausokalou dina era duavata ena vakabauta.—Wilika Joni 4:23, 24; 14:6; Efeso 4:4, 5.
Sarava na vidio E Vakadonuya na Kalou na Sokalou Kece?
2. Na cava a tukuna o Jisu me baleti ira na lotu vaKarisito lasu?
“Era tukuna raraba nira kila na Kalou, ia era cakitaki koya ena ka era cakava.”—TAITO 1:16.
A veivakasalataki o Jisu nira na tiko eso era na vakavuvulitaka na ka lasu. Ena rairai nanumi nira lotu vaKarisito dina, era na tukuna tale ga nira lotu vaKarisito. Ia o rawa ni kila nira sega ni lotu vaKarisito dina. Ena sala cava? O ira ga na lewena na sokalou dina ena laurai ena nodra itovo kei na ka era cakava nira lotu vaKarisito dina.—Wilika Maciu 7:13-23.
3. O na kilai ira vakacava na dausokalou dina?
Raica mada qo e lima na sala o na kilai ira kina:
-
O ira na dausokalou dina era doka na iVolatabu ni Vosa ni Kalou. Era saga mera muria na kena ivakavuvuli. E duidui gona na lotu dina mai na lotu e muria na ivakavuvuli vakatamata. (Maciu 15:7-9) O ira na dausokalou dina era sega ni vunau wale ga, ia era bulataka na ka era vunautaka.—Wilika Joni 17:17; 2 Timoci 3:16, 17.
-
O ira na imuri dina i Jisu era rokova na yaca ni Kalou, o Jiova. O Jisu a rokova na yaca ni Kalou ena nona vakatakila vei ira tale eso. A vukei ira na tamata mera kila na Kalou, a vakavulici ira tale ga mera masuta me vakarokorokotaki na yaca ni Kalou. (Maciu 6:9) Na lotu cava ena nomu itikotiko e dau vakatakila na yaca ni Kalou?—Wilika Joni 17:26; Roma 10:13, 14.
-
Era vunautaka na Matanitu ni Kalou na lotu vaKarisito dina. Na Kalou a talai Jisu me vunautaka na itukutuku vinaka ni Matanitu ni Kalou. E inuinui duadua ga ni kawatamata na Matanitu ni Kalou. A vunautaka tiko qori o Jisu me yacova na siga a mate kina. (Luke 4:43; 8:1; 23:42, 43) A tukuna nira na vunautaka tale ga qori na nona imuri. Na lotu cava o nanuma ni lewena o koya e vunautaka vei iko na itukutuku vinaka ni Matanitu ni Kalou?—Wilika Maciu 24:14.
-
Era sega ni tokona na vuravura ca qo na imuri i Jisu. O rawa ni kilai ira nira sega ni vakaitavi ena politiki se veileti vakamatatamata. (Joni 17:16; 18:36) Era sega tale ga ni vakatotomuria na ivakarau ca kei na ivakarau ni rai ni vuravura.—Wilika Jemesa 4:4.
-
E vakasakiti na nodra veilomani na lotu vaKarisito dina. Era vulica ena Vosa ni Kalou mera dokai ira na matatamata kece. E tokona vakalevu o lotu lasu na nodra veiraravui na veivanua, ia era sega ni cakava qori na dausokalou dina. (Maika 4:1-3) Era sega ni nanumi ira ga na lotu vaKarisito dina nira vakayagataka na nodra gauna kei na iyau mera veivuke kina ra qai veivakayaloqaqataki.—Wilika Joni 13:34, 35; 1 Joni 4:20.
4. O rawa ni kila na lotu dina?
Na lotu cava o nanuma e yavutaki ena Vosa ni Kalou na kena ivakavuvuli kece, e rokova na yaca ni Kalou qai vunautaka na Matanitu ni Kalou me inuinui duadua ga ni kawatamata? Na ilawalawa cava era dauveilomani ra qai sega ni tokona na ivalu?—Wilika 1 Joni 3:10-12.
