Raica sara na lewena

Raica na lewenivola

 LESONI 13

Na Cava ena Sotava o Lotu?

Na Cava ena Sotava o Lotu?

1. E vinaka na lotu kece?

Era lewena tu na lotu kece eso na tamata vinaka. E itukutuku marautaki ni kilai ira qori na Kalou, e kauaitaki ira tale ga. Ia e ka ni rarawa ni dau vakayagataki na yaca ni lotu me caka kina na ka ca. (2 Korinica 4:3, 4; 11:13-15) E vakamacalataki ena nius ni so mada ga na lotu era dau vakaitavi ena cakacaka ni batikadi, labakawa, ivalu, kei na nodra vakalolomataki na gone. Dua na ka nodra rarawataka qori o ira na dau guta na qaravi kalou!​—Wilika Maciu 24:3-5, 11, 12.

Na lotu dina e vakalagilagia na Kalou, ia na lotu lasu e vakararawataki koya. E vakavuvulitaka na ka e sega ni tukuna na iVolatabu, okati kina na ivakavuvuli lasu me baleta na Kalou kei ira na mate. Ia e vinakata o Jiova mera kila na tamata na ka dina me baleti koya.​—Wilika Isikeli 18:4; 1 Timoci 2:3-5.

2. Na cava ena sotava o lotu?

E marautaki nira sega ni dabuya na Kalou na lotu era tukuna tiko nira lomani koya, ia era lomana ga na vuravura i Setani. (Jemesa 4:4) Na Vosa ni Kalou e vakatokai ira na lotu lasu kece me “Papiloni na Ka Levu.” O Papiloni na korolevu ena gauna makawa a tekivu kina na lotu lasu ni oti na Waluvu ena siga i Noa. Sa voleka sara na gauna me yaco kina vakidacala na veivakarusai ni Kalou vei ira na lotu era dau veivakacalai qai veivakalolomataki.​—Wilika Vakatakila 17:1, 2, 5, 16, 17; 18:8.

E itukutuku marautaki tale ga ni o Jiova e sega ni guilecavi ira na tamata vinaka era lewena tu na lotu lasu e veiyasa i vuravura. E sa vakaduavatataki ira tiko qori ena nona vakavulici ira ena ka dina.​—Wilika Maika 4:2, 5.

 3. Na cava mera cakava na tamata vinaka?

Sa veivakaduavatataki tiko na lotu dina

O Jiova e kauaitaki ira era taleitaka na ka dina kei na ka vinaka. E uqeti ira mera biuta na lotu lasu. O ira era lomana na Kalou era yalorawarawa ni veisautaka nodra ivakarau ni bula mera vakamarautaki koya.​—Wilika Vakatakila 18:4.

Era marau sara ga na tamata vinaka ena imatai ni senitiuri nira rogoca na itukutuku vinaka eratou vunautaka na yapositolo. E vakavulici ira o Jiova ena ivakarau ni bula vou e vakainaki, era na marau qai nodra kina na inuinui. Era ivakaraitaki vinaka vei keda nikua nira ciqoma na itukutuku vinaka ena nodra vakaliuci Jiova ena nodra bula.​—Wilika 1 Cesalonaika 1:8, 9; 2:13.

O Jiova e ciqomi ira era biuta na lotu lasu mera lewe ni nona vuvale era qaravi koya. O na veitokani kei Jiova ke o ciqoma na nona veisureti vakayalololoma. Ena dua na nomu vuvale vou, era lewena na tamata i Jiova era dau veilomani. O na rawata tale ga na bula tawamudu.​—Wilika Marika 10:29, 30; 2 Korinica 6:17, 18.

4. Sala cava ena kauta mai kina i vuravura na marau na Kalou?

E itukutuku marautaki ni sa voleka ni vakarusai o lotu lasu, nira na sereki kina na lewe i vuravura mai na nona veivakalolomataki. Ena sega tale ni veivakacalai se vakavu veisei o lotu lasu ina kawatamata. O ira kece na bula era na duavata ni qarava na Kalou dina duadua ga.​—Wilika Vakatakila 18:20, 21; 21:3, 4.