Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 LESONI 8

Na Cava e Vakatara Tiko Kina na Kalou na Ca kei na Rarawa?

Na Cava e Vakatara Tiko Kina na Kalou na Ca kei na Rarawa?

1. A tekivu vakacava na ca?

Na gauna e solia na Kalou vua na tamata me veiliutaki e sa veirauti me vakadinadinataka kina nira sega ni walia rawa na leqa ni kawatamata

A tekivu e vuravura na ca ena imatai ni gauna a lasu kina o Setani. O Setani a dua tu na agilosi uasivi, ia a “sega ni dei ena dina.” (Joni 8:44) A vinakata na sokalou a dodonu me caka duadua ga vei Jiova. O Setani a lasutaki Ivi na imatai ni yalewa qai rawai koya me vakarorogo vua, me talaidredre vua na Kalou. Me vakataki Ivi, a talaidredre tale ga o Atama. Na vakatulewa i Atama e vakavuna na rarawa kei na mate.​—Wilika Vakatekivu 3:1-6, 19.

Ni tukuna o Setani me talaidredre o Ivi vua na Kalou, a tekivuna sara ga kina na kena saqati na nona veiliutaki cecere na Kalou se na dodonu ni nona veiliutaki. Me vakataki Setani, e levu era sega tale ga ni vinakata me nodra iLiuliu na Kalou. E yaco gona o Setani me “turaga ni vuravura.”​—Wilika Joni 14:30; 1 Joni 5:19.

2. E ca na ka e bulia na Kalou?

Na ka kece e bulia na Kalou e uasivi. A rawa ni vinaka vakaoti na nodra talairawarawa vua na Kalou na tamata kei na agilosi a bulia. (Vakarua 32:4, 5) Ena gauna a buli keda kina na Kalou, a solia vei keda na galala ni vakatulewa meda cakava na veika vinaka se ca. Na galala ni vakatulewa oya e dua na sala eda rawa ni vakaraitaka kina nida lomana na Kalou.​—Wilika Jemesa 1:13-15; 1 Joni 5:3.

3. Na cava se vakatara tiko kina ena gauna qo na rarawa na Kalou?

E vakatara tiko ena loma ni dua na gauna o Jiova me saqati na nona veiliutaki. Na cava na vuna? Me vakadinadinataki kina ni veiliutaki ga ni Kalou ena yaga vua na kawatamata. (Dauvunau 7:29; 8:9) Na 6,000 na yabaki ni bula ni kawatamata e sa  vakadinadinataka ni guce na nodra sasaga na veiliutaki mera vakaotia na ivalu, basulawa, ivalavala tawadodonu, se na tauvimate.​—Wilika Jeremaia 10:23; Roma 9:17.

Ni laurai vata kei na veiliutaki vakatamata, o ira era tokona na veiliutaki ni Kalou era na vakila na kena yaga. (Aisea 48:17, 18) Sa voleka sara me muduka o Jiova na matanitu kece vakatamata. O ira ga era digia me liutaki ira na Kalou era na bula e vuravura.—Aisea 11:9.​—Wilika Taniela 2:44.

Sarava na vidio Na Cava e Vakatara Tiko Kina na Kalou na Rarawa?

4. Yaga vakacava vei keda na nona vosovoso na Kalou?

E tukuna o Setani ni tamata e qaravi Jiova ga ena yalokocokoco. Vakacava o na via vakalasuya na veibeitaki ya? O rawa ni cakava qori! Nona vosovoso na Kalou eda rawa ni vakaraitaka kece kina se da tokona na veiliutaki ni Kalou se na veiliutaki vakatamata. Ena laurai na noda vakatulewa ena ivakarau ni noda bula.​—Wilika Jope 1:8-12; Vosa Vakaibalebale 27:11.

5. Eda na vakaraitaka vakacava nida digia na Kalou me noda iLiuliu?

Na noda vakatulewa ena kilai kina ke da vinakata me noda iLiuliu na Kalou

Eda rawa ni vakaraitaka qori ena noda vulica da qai tutaka na sokalou dina e yavutaki ena Vosa ni Kalou na iVolatabu. (Joni 4:23) Me vakataki Jisu, meda kua tale ga ni vakaitavi ena politiki kei na ivalu meda vakaraitaka kina ni sega ni noda iliuliu o Setani.​—Wilika Joni 17:14.

E vakayagataka na nona kaukaua o Setani me uqeta kina na ivalavala tawakilikili, kei na ivakarau ni bula e veivakaleqai. Nida cata na ivalavala va qori, era na rairai vakalialiai keda se tusaqati keda eso na noda itokani kei na wekada. (1 Pita 4:3, 4) Ena gadrevi meda vakatulewataka na ka meda cakava. Eda na vakailala kei ira era lomana na Kalou? Eda na talairawarawa ina nona lawa na Kalou vuku qai dauloloma? Ke da cakava qori, eda sa vakalasuya na nona tukuna o Setani ni sega ni dua ena cakava na ka e vinakata na Kalou ke sotavi na ituvaki dredre.​—Wilika 1 Korinica 6:9, 10; 15:33.

Na nona lomana na kawatamata na Kalou e vakadeitaka ni na oti na ca kei na rarawa. O ira era vakabauta qori era na marautaka na bula e vuravura me tawamudu.​—Wilika Joni 3:16.