Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 LESONI 17

Me Dei na Veitokani, Mo Dua Tale ga na iTokani Vinaka o Iko

Me Dei na Veitokani, Mo Dua Tale ga na iTokani Vinaka o Iko

Yavutaki ena loloma na veitokani. Na levu ga ni nomu kilai Jiova, na levu tale ga ni nomu na lomani koya. Ni tubu na nomu lomana na Kalou, ena tubu tale ga na nomu gadreva mo qaravi koya. Oqo ena uqeti iko mo tisaipeli i Jisu Karisito. (Maciu 28:19) Ni o mai lewe ni mataveiwekani mamarau ni iVakadinadina i Jiova, sa na rawa ni o veitokani tawamudu kei na Kalou. Na cava mo cakava?

E dodonu mo vakaraitaka ni o lomana na Kalou ena nomu talairawarawa ina nona ivunau. “Sai koya oqo na loloma vua na Kalou, me da muria na nona vunau: a sa sega ni ka bibi na nona vunau.”​—1 Joni 5:3.

Vakayagataka na ka o vulica. E talanoataka o Jisu e dua na italanoa me vakabibitaka na tikina oqo. E tara na nona vale e dua na tamata vuku ena delanivatu. Na tamata lialia e tara na nona vale ena delaninuku. Ni laba mai na cava levu, a sega ni bale na vale e tara ena delanivatu, ia na vale e tara e delaninuku e bale, e kasura sara ga. Sa qai kaya o Jisu ni o ira era rogoca na nona ivakavuvuli ra qai muria, era vakataki koya na vuku e tara nona vale e delanivatu. Ia, o ira era rogoca na nona ivakavuvuli ra qai sega ni muria, era vakataki koya na lialia e tara vale ena delaninuku. O na via tautauvata kei cei vei rau?—Maciu 7:24-27.

 Yalayala. O vakayacora oqo ena nomu masu vei Jiova o qai tukuna vua ni o sa via cakava na lomana me tawamudu. Na nomu cakava na loma ni Kalou e vakaraitaka ni o tisaipeli i Jisu Karisito.—Maciu 11:29.

Papitaiso. “Mo papitaisotaki, me vui laivi na nomu i valavala ca, ni ko sa masuta tiko na yacana.”—Cakacaka 22:16, VV.

Solia nomu bula mo qarava na Kalou. “Na ka kecega dou sa cakava, kitaka mai na vu ni yalomudou me vaka vua na Turaga, me kakua ni vaka vei ira wale ga na tamata.”—Kolosa 3:23.