Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 LESONI 1

E Sureti Iko na Kalou Mo Nona iTokani

E Sureti Iko na Kalou Mo Nona iTokani

E vinakata na Kalou mo nona itokani. O sa bau vakasamataka ni rawa mo itokani i Koya e cecere duadua ena lomalagi kei na vuravura? E dua a bula ena gauna makawa o Eparama, a vakatokai o koya me itokani ni Kalou. (Jemesa 2:23, VV) E cavuti ena iVolatabu e so tale era dau veitokani kei na Kalou, ra qai vakalougatataki vakalevu kina. Nikua, sa ra mai itokani ni Kalou na veimataqali tamata mai na veiyasa i vuravura. O iko tale ga e rawa mo itokani ni Kalou.

E vinaka cake meda itokani ni Kalou, e ca meda itokani ni tamata. Na Kalou e sega vakadua ni vakavuna mera vakanuinuikara na nona itokani yalodina. (Same 18:25) E vinaka meda itokani ni Kalou, e ca na iyau. Ni mate na tamata vutuniyau, era na lai lewa na tani na nona iyau. Ia, o ira na itokani ni Kalou era taukena e dua na iyau e sega ni dua e rawa ni kauta laivi.—Maciu 6:19.

Era na via tarovi iko e so ena nomu vuli tiko mo kua ni kila na Kalou. E so sara mada ga na nomu ilala era na via vakayacora oqo, bau kina e so na wekamu voleka. (Maciu 10:36, 37) Ke ra dredrevaki iko se ra vakarerei iko, vakasamataka mada se o cei o via vakamarautaka—na tamata se na Kalou? Vakasamataka tale mada oqo: Ke dua e tukuna vei iko mo sa kakua tale ni qai kana, o na rogoci koya? Macala tu ga ni na sega! O kana mo bula tiko kina. Ia, na Kalou e rawa ni solia vei iko na bula tawamudu! Kua gona ni vakalaiva me dua e mai tarovi iko ena nomu vulica tiko na sala mo itokani kina ni Kalou.​—Joni 17:3.