Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 LESONI 5

Era na Bula ena Parataisi na iTokani ni Kalou

Era na Bula ena Parataisi na iTokani ni Kalou

Ena sega ni vaka na vuravura eda bula tu kina oqo na Parataisi. A sega ni inaki ni Kalou me mai tiki tu ni bula e vuravura na leqa kei na vutugu, na mosi kei na rarawa. Ena dua tiko ga na gauna oqo, ena qai vukica na Kalou na vuravura me parataisi. Ena vakacava sara mada na Parataisi? Raica mada se cava e kaya na iVolatabu:

Tamata vinaka. O Parataisi ena nodra itikotiko na itokani ni Kalou. Era na dui cakava na ka vinaka. Era na bulataka ga na ivalavala dodonu ni Kalou.—Vosa Vakaibalebale 2:21.

Levu na kakana. E sega ni dua ena waloloi ena Parataisi. E kaya na iVolatabu: “Ena sa tu e vuravura e na dela ni veiulu-ni-vanua na sila [se kakana] e qumi rawarawa ga.”—Same 72:16.

Vale vinaka kei na cakacaka marautaki. Ena Parataisi e vuravura, ena vakavale na vuvale yadua. Na tamata yadua ena cakava na cakacaka ena vakamarautaki koya dina.—Aisea 65:21-23.

 Sautu o vuravura. Sa na sega tale na vala, se me so e mate ena ivalu. E kaya na Vosa ni Kalou: “Sa vakaotia nai valu [na Kalou].”—Same 46:8, 9.

Bulabula vinaka. E yalataka na iVolatabu: “Ia na lewe ni koro [e Parataisi] ena sega ni kaya, Ka’u sa tauvi mate.” (Aisea 33:24) Ena sega tale ga ni dua e lokiloki, mataboko, didivara, se galu.—Aisea 35:5, 6.

Sa na sega tale na rarawa, vutugu, kei na mate. E kaya na Vosa ni Kalou: “Sa na sega tale na mate; sa na sega tale ga na rarawa se na tagi se na vutugu, ni ra sa takali tani na veika makawa.”—Vakatakila 21:4, VV.

Era sa na yali na tamata ca. E yalataka o Jiova: “Ko ira na tamata ca era na muduki tani e vuravura, kei ira na dautalaidredre era na cavu laivi maikina.”—Vosa Vakaibalebale 2:22.

Era na veilomani na tamata, era na veidokai. Sa na sega tale na lewa ca, veivakalolomataki, kocokoco, kei na veicati. Era na duavata na tamata, era na muria kece na lawa ni Kalou.—Aisea 26:9.