Raica sara na lewena

Raica na lewenivola

 ITALANOA 105

Wawaraki Tiko e Jerusalemi

Wawaraki Tiko e Jerusalemi

O IRA kece oqo era imuri i Jisu. Era muria na veika e kaya mera wawa tiko e Jerusalemi. Nira se wawa tiko ga, sa curuma na vale taucoko e dua na rorogo levu e vaka na liwa ni cagi kaukaua. Sa qai laurai mai na yameyame ni bukawaqa ena dela ni uludra yadua na tisaipeli. O raica rawa na yameyame ni buka? Na cava na kena ibalebale?

Oqo e dua na cakacaka veivakurabuitaki! Sa tiko tale mai lomalagi o Jisu vata kei Tamana, qai sovaraka mai na yalo tabu vei ira na nona imuri. Era vosataka kina na veimataqali vosa.

E levu e Jerusalemi era rogoca na rorogo e vaka na cagi kaukaua, ra qai lako yani mera lai vaqaqa. E so vei ira oqo era lako mai na so tale na matanitu mera mai tiko ena kana magiti ni Penitiko. Era rogoca e dua na ka veivakurabuitaki na vulagi! Era vosataka tiko na tisaipeli ena nodra vosa na veika totoka sa vakayacora na Kalou.

Era kaya: ‘Era kai Kalili kece qo. Ia e rawa vakacava mera vosataka na vosa ni veivanua keimami dui lako mai kina?’

Sa qai vakamacala vei ira o Pita. E vosa vakadomoilevu qai vakamacalataka na mate i Jisu kei na nona vakaturi tale mai na mate vei Jiova. E kuria o Pita: ‘Sa tiko mai lomalagi o Jisu ena liga imatau ni Kalou, qai sovaraka mai na yalo tabu. Oqori na vuna dou raica tiko kina qai rogoca tale ga na ka veivakurabuitaki oqo.’

Era rarawataka na veika a yaco vei Jisu e levu na tamata ni sa vakamacala oti vei ira o Pita. Era taroga: ‘Na cava me keimami cakava?’ E qai kaya vei ira o Pita: ‘Dou veisautaka na nomudou bula, dou qai papitaiso.’ Ena siga tiko ga oya, era papitaiso kina e rauta ni lewe 3,000 ra qai muri Jisu.