Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 107

Vakaviriki ena Vatu o Sitiveni

Vakaviriki ena Vatu o Sitiveni

E TEKIDURU tu oqori o Sitiveni na tisaipeli yalodina i Jisu. Ia raica mada na ka e caka tiko vua! E so era viriki koya tiko ena vatu lelevu. Na cava era sa rui sevaki Sitiveni mera cakava kina vua na ivalavala torosobu oqo? Meda raica mada.

E dau vukei Sitiveni na Kalou me cakava na ka veivakurabuitaki. Era sega ni taleitaka na turaga oqo, ra mani veiba kei koya ena vuku ni ka dina e vakavulici ira tiko kina na lewenivanua. Ia na Kalou e solia na vuku vei Sitiveni, qai vakacala o koya na nodra ivakavuvuli. E vakacudrui ira sara ga vakalevu oya, ra mani vesuki koya qai kacivi mai eso mera beitaki koya vakailasu.

Sa qai tarogi Sitiveni na bete levu: ‘E dina na veika oqo?’ A sauma o Sitiveni ena dua na ivakamacala totoka mai na iVolatabu. E tinia ena nona tukuna na nodra ca na tamata ena gauna eliu nira a cati ira na parofita i Jiova. Sa qai kaya: ‘Dou sa vakataki ira na tamata oya. Ni dou a vakamatea na dau veiqaravi ni Kalou o Jisu, dou qai sega ni talairawarawa ina lawa ni Kalou.’

Sa qai kuria ga na nodra cudru na iliuliu ni lotu! Era kati bati sara ga ena levu ni nodra cudru. E rai cake o Sitiveni, qai kaya: ‘Raica! Au sa raici Jisu ni tu ena yasa imatau ni Kalou mai lomalagi.’ Era sogota na daligadra, ra qai cicivi koya yani. Ra vesuki koya ra qai yarataka yani ina ibili ni koro.

Era solia vei Saula na nodra kote me raica tiko. O raici koya rawa? Oti oya era sa qai vakaviriki Sitiveni e so. E tekiduru o Sitiveni, me vaka o raica tiko oqori, qai masu vua na Kalou: ‘I Jiova ni kua ni totogitaki ira ena ka ca oqo.’ E kila o koya nira vakamuai cala e so mai vei ira na iliuliu ni lotu. Oti sa qai mate o Sitiveni.

Ni dua e cakava vei iko e dua na ka ca, o dau via sauma lesu, se o kerea vua na Kalou me qai sauma? Rau a sega ni cakava oqori o Sitiveni kei Jisu. Erau yalovinaka vei ira na sega mada ga ni dau yalovinaka vei rau. Meda saga gona meda ucui rau.