Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 113

Tiko Mai Roma o Paula

Tiko Mai Roma o Paula

RAICA mada na sinucodo e vesu tu kina o Paula kei na sotia ni Roma e yadravi koya tiko. E kaivesu tiko mai Roma o Paula. E waraka na vakatulewa i Sisa, na iliuliu kei Roma. Dina ni vesu tu, e vakatarai ga mera sikovi koya yani e so tale.

Oti e tolu na siga nona yaco i Roma o Paula, talatala sara yani vei ira e so na nodra iliuliu na Jiu mera mai raici koya. E levu era gole yani qai vunautaka vei ira o Paula na veika me baleti Jisu kei na Matanitu ni Kalou. E so era vakabauta ra qai mai lotu Vakarisito, ia e so tale e sega.

E vunau tale ga o Paula vei ira na sotia era dau mai yadravi koya. E vunau vei ira kece ga e sotava ena nona vesu tiko me rua na yabaki. Era rogoca rawa kina na lewe ni vuvale i Sisa na itukutuku vinaka ni Matanitu ni Kalou, qai yaco e so mera lotu Vakarisito.

Ia o cei ga na vulagi e volavola toka oqori ena teveli? O kilai koya? Io, o Timoci. A kaivesu tale ga o Timoci ni vunautaka tiko na Matanitu, ia a sereki tale. E mai vukei Paula tiko oqori. O kila se cava e vola tiko? Meda raica mada.

O se nanuma tiko na korolevu o Filipai kei Efeso ena iTalanoa 110? A veivuke o Paula ena tauyavutaki ni ivavakoso Vakarisito ena veikoro oqori. Ia ni sa mai tiko oqo e valeniveivesu, e vola tiko e so na ivola vei ira na lotu Vakarisito mai kea. Sa ra tu ena iVolatabu na ivola oqo, na ivola ni Efeso kei na Filipai. E tukuna tiko oqori vei Timoci na veika me vola vei ira na nona itokani lotu Vakarisito mai Filipai.

Era dau caka vinaka vei Paula na kai Filipai. Era a vakauta yani vua e dua na iloloma, qai vakavinavinakataki ira tiko kina o Paula. A kauta mai na iloloma o Epafirotaito. A tauvimate o koya qai voleka sara ga ni mate, ia sa vakarau lesu tale ni sa bula vinaka. Ena kauta tale tiko ga na ivola i Paula kei Timoci ni sa lesu i Filipai.

Ni se tiko ga e valeniveivesu o Paula, a vola tale kina e rua na ivola e tiko ena iVolatabu. E dua e vola vei ira na lotu Vakarisito ena korolevu o Kolosa. E dua tale e nona ivola sara ga vua na nona itokani voleka o Filimoni e tiko tale ga mai Kolosa. Na ivola oqori e baleti Onesimo na dauveiqaravi i Filimoni.

A drovaki Filimoni o Onesimo qai dro sara i Roma. A kila ni kaivesu tiko o Paula, mani sikovi koya sara yani qai vunau vua o Paula. Sega ni dede sa mai lotu Vakarisito sara o koya, qai veivutunitaka nona a dro. Ia o kila na ka e vola o Paula vei Filimoni?

E kerei Filimoni tiko o Paula me vosoti Onesimo. E vola: ‘Au sa talai koya tale yani vei iko, sa sega wale ga ni nomu dauveiqaravi, e sa dua tale ga na tacida Vakarisito.’ Ni lesu tale i Kolosa o Onesimo, e kauta tiko kina e rua na ivola oqo, e dua vei ira me baleti ira mai Kolosa kei na kena ikarua vei Filimoni. Sa na wacava na marau i Filimoni ni sa lotu Vakarisito o Onesimo na nona dauveiqaravi.

Ena ivola i Paula vei Filimoni kei ira mai Filipai, e kaya kina: ‘Au sa talai Timoci yani vei kemudou.’ E kaya vei ira mai Filipai: ‘Ia au na qai lako yani vakamalua.’ Ena nona ivola vei Filimoni, e vola: ‘Vakarautaka e dua na vanua meu na tiko kina.’

Ni sa sereki o Paula, e lai sikovi ira sara na tacina kei na ganena lotu Vakarisito ena levu na vanua. Ia emuri sa baci mai kaivesu e Roma. Na gauna oqo e kila o koya ni sa na vakamatei. Sa qai vola me lako vakatotolo yani vua o Timoci. ‘Au sa dau yalololoma vua na Kalou, ena vakaicovitaki au kina o koya,’ e vola o Paula. Sega ni dede nona mate o Paula, sa vakarusai Jerusalemi tale na mataivalu ni Roma.

Ia e levu tale tu na ka e vakamacalataki ena iVolatabu. A uqeti Joni o Jiova me volai na iotioti ni vica na ivola, wili kina na Vakatakila. Na Vakatakila e tukuna na veika ena qai yaco emuri. Meda raica mada se cava na veika oya.