Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 106

Sereki Mai Valeniveivesu

Sereki Mai Valeniveivesu

RAICA mada na agilosi e dolava tu oqori na katuba ni valeniveivesu. E sereki iratou tiko na yapositolo i Jisu. Meda raica mada na vu ni nodratou bala i valeniveivesu.

A yaco na veika oqo ni oti ga vakalailai na sovaraki ni yalo tabu vei ira na tisaipeli i Jisu. Ena dua na yakavi, rau a lako o Pita kei Joni ina valenisoro e Jerusalemi. A dabe voleka toka e katuba e dua na turaga e lokiloki ena nona bula taucoko. Era dau laveti koya mai e ke me kere ilavo vei ira na curu tiko ina valenisoro. Ni raici Pita kei Joni e kerei rau sara me rau solia vua e dua na ka. Na cava erau na cakava na yapositolo?

Erau vakaraici koya na tamata vakaloloma oqo qai kaya o Pita: ‘E sega vei au na ilavo, ia au sa na solia ga vei iko na ka sa tu oqo vei au. Ena yaca i Jisu, tucake mo lako!’ E taura na ligana imatau o Pita, e tucake vakasauri qai lako. Era kurabui ra qai marau o ira na raica na cakamana oqo.

E kaya o Pita: ‘Keirau cakava oqo ena kaukaua ni Kalou, o koya a vakaturi Jisu mai na mate.’ Ni rau se tukuna tiko ga na veika oqori era sa basika yani e so na iliuliu ni lotu. Sa dua na ka nodra katakata ni rau tukuna tiko na vakaturi i Jisu. Rau mani vesu me rau bala i valeniveivesu.

Era bose sara na iliuliu ni lotu ena siga e tarava. Eratou tiko kina o Pita, o Joni, kei koya a vakabulai. Era taroga na iliuliu ni lotu: ‘Ena kaukaua i cei drau a cakava kina na cakamana oya?

E kaya o Pita ni kaukaua ga ni Kalou o koya a vakaturi Jisu. Era sega ni kila na bete na cava mera cakava, ni a yaco dina na cakamana vakatubuqoroqoro oya. Era vakaroti rau me rau lako ia me rau kua tale vakadua ni tukuna na veika baleti Jisu.

Ni toso na siga eratou vunautaka tiko ga na yapositolo na veika baleti Jisu, ra vakabulai tale ga na tauvimate. E tete na itukutuku ni cakamana oqo. O ira sara mada ga na veikoro era tiko volekati Jerusalemi era kauti ira mai na tauvimate mera mai vakabulai. Era sa qai vuvu ga vakalevu na iliuliu ni lotu, ratou baci bala i valeniveivesu na yapositolo. Ia eratou sega ni dede kina.

A dolava na katuba ni valeniveivesu ena lomaloma ni bogi na agilosi ni Kalou me vaka o raica tiko oqori. E kaya na agilosi: ‘Dou lai vosa vei ira na tamata ena valenisoro.’ Ena mataka e tarava nira qai talai yani eso mai vei ira na iliuliu ni lotu mera lai kauti iratou mai na yapositolo, eratou sa yali. Eratou laurai sara mai na valenisoro ni ratou veivakavulici tiko. Eratou qai kau yani ina matadra na lewe ni Sanadrini.

Era kaya na iliuliu ni lotu: ‘Keitou a vakaroti kemudou mo dou kua ni vakavuvuli ena yaca i Jisu, ia oqo sa roboti Jerusalemi na nomudou ivakavuvuli.’ Eratou sauma na yapositolo: ‘E dodonu me keitou vakarorogo vua na Kalou, me kua ga vua na tamata.’ Oya e dua na ivakaraitaki vinaka meda muria.