Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 103

Curu ina Rumu Sogobutu

Curu ina Rumu Sogobutu

NI RAU sa biuta na ibulubulu o Pita kei Joni, a tiko taudua ga yani o Meri. E tekivu tagi sara mani iro yani e loma ni bulubulu, me vaka eda sa raica oti ena iyaloyalo eliu. A qai raica e rua na agilosi! Erau tarogi koya: ‘Na cava o tagicaka?’

E sauma o Meri: ‘Era sa kauta na noqu Turaga, au sega ni kila na vanua era kauta kina.’ Sa qai vuki mai o Meri, e raica sara e dua na turaga. A tarogi koya mai na turaga oya: ‘O vaqarai cei?’

E nanuma o Meri ni dua ga na dau teitei o koya, de a kauta na yago i Jisu. E kaya vua o Meri: ‘Ke o kauti koya, tukuna na vanua o lai biuti koya kina.’ Ia o Jisu ga erau veivosaki tiko oya kei Meri. E kilasevati koya ena vuku ni yago e vakayagataka o Jisu me vakaraitaki koya kina vua. Ia ni kaciva na yacana, e kila sara o Meri ni oqo ga o Jisu. E cici yani qai tukuna vei iratou na tisaipeli: ‘Au sa raica na Turaga!’

Ena siga tale ga oya ni rau taubale tiko e rua na tisaipeli ina koro o Emeo, a mai tomani rau e dua na tamata. Erau rarawataka vakalevu na mate i Jisu. Ia ni ratou lako tiko, e vakamacalataka na tamata oqo e levu na ka mai na iVolatabu me vakacegui rau kina. Ni ratou sa vakacegu me ratou kana, rau qai kila na tisaipeli ni turaga ga oqo o Jisu. A qai yali vakasauri mai matadrau, rau mani vakatotolo yani na tisaipeli i Jerusalemi me rau lai tukuna vei iratou na yapositolo na veika me baleti Jisu.

Ena gauna e yaco tiko kina oqori a rairai vei Pita o Jisu. Era marau tale ga na kena vo nira rogoca na veika oqo. Erau lesu i Jerusalemi na tisaipeli oqo, me rau lai tukuna nona rairai tale ga o Jisu vei rau e gaunisala. Ni rau se tukuna tiko ga na veika oqo, e yaco na ka veivakurabuitaki. Na cava beka?

Raica mada na iyaloyalo. Sa rairai o Jisu e lomanivale, dina ga ni a sogo tu na katuba. E siga marautaki dina vei ira na tisaipeli oya. O rawa ni wilika beka se a rairai vakavica o Jisu vei ira na nona imuri? E vakalima.

A sega ni tiko na yapositolo o Tomasi ena gauna a rairai kina vei ira na kena vo o Jisu. Eratou qai tukuna vua na tisaipeli: ‘Keitou sa raica na Turaga!’ Ia e kaya o Tomasi ni na qai vakabauta ga ke raici Jisu. Oti tale e walu na siga eratou a tiko na yapositolo kei Tomasi ena dua na rumu. Vakasauri ga sa basika mai kina o Jisu. Sa qai vakabauta o Tomasi.