Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 97

Lako Mai o Jisu me Vaka na Tui

Lako Mai o Jisu me Vaka na Tui

SEGA ni dede na nodrau vakabulai na dau kerekere mataboko, a lako yani o Jisu ina dua na koro lailai e volekati Jerusalemi. E kaya vei rau e rua na nona tisaipeli: ‘Drau lako ina koro, drau na kunea kina e dua na luve ni asa. Drau kauta mai vei au.’

Ni kau mai vua na asa, e vodoka sara yani o Jisu me lako kina i Jerusalemi. Ni sa volekata yani na korolevu era sa tavaki koya tu mai na ilawalawa levu. Levu era luvata na nodra kote ra qai tevuka e gaunisala, e so tale era taya mai na drauniniuniu mera biuta tale ga i gaunisala, ra qai kailavaka: ‘Me vakalougatataka na Kalou, na tui o koya e lako mai ena yaca i Jiova!’

Ena gauna eliu, ke buli e dua nodra tui vou na Isireli, ena vodoka o koya na luve ni asa i Jerusalemi mera raici koya kina na lewenivanua. E cakava sara tiko ga na ka oqori o Jisu. O ira gona oqo era vakaraitaka nira vinakati Jisu me nodra tui. Ia e sega ga ni o ira kece. Eda kila rawa oqo mai na ka e yaco ni lako yani ina valenisoro o Jisu.

E vakabulai ira na lokiloki kei na mataboko o Jisu ena valenisoro. Nira raica na gone na veika oqori era kaila ra qai vakacaucautaki koya tale ga. E vakacudrui ira dina na bete. Era kaya vei Jisu: ‘O rogoca na veika era sa kaya tiko na gone?’

E sauma o koya: ‘Io, au sa rogoca. Dou sega li ni wilika ena iVolatabu ni tukuni tu kina: Mai na gusudra na lalai ena vakavurea na Kalou na veivakacaucautaki?’ O koya gona, era vakacaucautaki koya tiko na tui digitaki ni Kalou na gone.

Dodonu tale ga meda vakamurimuri ira na gone oqori, se vakaevei? Era na via tarovi keda beka e so nida tukuna tiko na veika e baleta na matanitu ni Kalou. Ia meda kua ni cegu ni tukuna na veika vinaka ena cakava o Jisu vei keda.

Ni se tiko voli e vuravura o Jisu, a se sega ni kena gauna oya me veiliutaki kina vakatui. Eratou a via kila na nona tisaipeli se gauna cava ena qai veiliutaki kina. Eda na qai wilika na veika oqori.