Raica sara na lewena

Raica na lewenivola

 ITALANOA 93

Vakania e Levu o Jisu

Vakania e Levu o Jisu

E DUA na ka rerevaki a yaco. E se qai vakamatei oti ga o Joni na Dauveipapitaiso. E sega ni taleitaki koya o Erotiasa na wati ni tui qai vakacuruvosa vua na tui me musu na ulu i Joni.

E rarawa kina vakalevu o Jisu. Ni lako duadua yani ina veivanua lala, era se muri koya tiko ga na tamata. Ni raici ira o Jisu, e lomani ira sara ga. Sa qai tukuna vei ira na veika e baleta na matanitu ni Kalou, qai vakabulai ira tale ga na tauvimate.

Ni sa yakavi mai era kaya vua na nona tisaipeli: ‘Sa bogi mai, qai lala na vanua oqo. Tukuna vei ira na tamata oqo mera lai voli kedra mai na veikoro voleka.

E kaya o Jisu: ‘Sega ni dodonu mera lako. Solia vei ira e so na ka mera kania.’ E golevi Filipi o Jisu qai taroga: ‘Eda rawa beka ni volia mai vei na kakana me rauti ira?’

E sauma yani o Filipi: ‘Kevaka mada ga mera vakalalai, ena se sau levu tiko ga na kakana.’ E kaya cake mai o Adriu: ‘E tiko vua na gone oqo e lima na madrai kei na rua na ika. Ia ena sega ni rauti ira kece.’

E kaya o Jisu: ‘Tukuna mera dabe ena veico.’ Sa qai vakavinavinakataka na kakana vua na Kalou, qai dovia vakalalai. Era veisoliyaka sara yani na tisaipeli na ika kei na madrai vei ira na lewe 5,000 na tagane kei na vica tale na udolu na yalewa kei na gone. Era kana me yacova sara nira sa mamau. Ni ratou sa kumuna na tisaipeli na kena vo, eratou vakasinaita rawa e 12 na basikete!

Sa qai vodo o Jisu kei iratou na nona tisaipeli ena dua na waqa me ratou takoso yani ena Wasawasa o Kalili. E tubu e dua na draki ca levu ena bogi oya qai yavala vakalevu na waqa. Eratou domobula na tisaipeli. Eratou qai raica tale ga ni dua e lako tiko ena dela ni wai ena lomaloma ni bogi oya. Eratou kaci sara yani ena rere, ni ratou sega ni kila se cava eratou raica tiko.

E kaya mai o Jisu: ‘Dou kua ni rere. O yau ga qo!’ Eratou sega ga ni vakabauta. Sa qai kaya o Pita: ‘Ke sa o kemuni dina qori, Turaga, meu na lako yani vei kemuni.’ Sa qai kaya o Jisu: ‘Lako mai!’ E lako sara yani o Pita e dela ni wai. Sa tekivu lutudromu ni sa rere ia e qai vakabulai koya o Jisu.

Emuri a vakani ira tale ga e udolu o Jisu. Ena gauna oqo e vakayagataka kina e vitu na ibuli madrai kei na so na ika lalai. Era mamau kece kina. E ka marautaki dina nona dau kauaitaki ira na tamata o Jisu. Ni sa na veiliutaki me tui digitaki ni Kalou, eda na sega ni leqataka e dua na ka!