O KILA se o cei na gone lailai oqo? Oqori o Jisu ni se qai sucu ga ena vale ni manumanu. E vakadavori Jisu tiko o Meri ena nodra vanua ni kana na manumanu. Na cava erau mai tiko vata kina kei ira na manumanu o Meri kei Josefa? Oqo e sega ni vanua me mai vakasucumi tu kina e dua na gone.

E sega dina! Ia e tiko e dua na vuna e mai sucu kina e ke o Jisu. A bulia e dua na lawa na iliuliu kei Roma o Sisa Okusito mera dui lesu ina koro era a sucu kina na lewenivanua kece mera lai volayaca. O Josefa a sucu mai Peceliema. Ia ni rau yaco yani kei Meri, e sega tale ni dua na vale e bau lala me rau tiko kina. Rau sa qai lako ga ina nodra vale na manumanu me rau lai tiko kina. Ena siga tale ga oya a vakasucumi Jisu kina o Meri!

O raici ira na ivakatawa ni sipi nira mai raici Jisu tiko? Era a vakatawa sipi voli ena bogi, qai cilavi ira e dua na rarama. Oya e dua na agilosi. Era rere vakalevu na ivakatawa qai kaya na agilosi: ‘Au mai tukuna e dua na i tukutuku vinaka. Edaidai sa sucu kina mai Peceliema na noda Turaga na Karisito. Ena vakabulai ira na tamata! Dou na raici koya ni ologi koto ena isulu ena nodra vale na manumanu.’ Era rairai tale mai e levu na agilosi mera vakarokorokotaka na Kalou. Era vakatotolo yani na ivakatawa mera vaqarai Jisu. Oti ra sa qai kunei koya.

O kila se cava e duidui kina o Jisu? O kila se o cei sara mada o koya? Ena itekivu ni talanoa ena wase oqo a tukuni kina vei keda ni imatai ni Luve ni Kalou. Erau a cakacaka vata kei Jiova ena buli ni lomalagi kei vuravura.

E toki koya mai o Jiova mai lomalagi ina kete i Meri. Sa qai mai tiko na gone ena kete i Meri me vaka ga na nodra dau tubu mai na gone ena kete i tinadra. Ia e Luve ni Kalou na gone oqo. A sucu dina o Jisu ena vale ni manumanu e Peceliema. Oqori na vuna era marau kina na agilosi mera tukuna yani na sucu i Jisu vei ira na lewenivanua.