Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 100

Tiko ena Were o Jisu

Tiko ena Were o Jisu

ERATOU biubiu mai na loma ni tabavale e cake oya o Jisu kei iratou nona yapositolo, ratou gole sara ina were o Kecisemani. Eratou dau lako kina vakalevu eliu. Sa qai kaya vei iratou o Jisu me ratou yadra me ratou masu tale tiko ga. Mani lako vakatikitiki o koya, e cuva ina qele qai masu.

Dede vakalailai, e lesu yani vei iratou nona yapositolo o Jisu. Na cava beka o nanuma ni ratou cakava tiko? Eratou moce! E vakatolu nona tukuna o Jisu me ratou yadra tiko, ia eratou moce tiko ga. Ni lesu yani ena iotioti ni gauna, sa qai kaya: ‘E rawa vakaevei mo dou qai moce tale tiko ena gauna vaka oqo? Sa kena gauna meu kau yani kina vei ira na kequ meca.’

Ena gauna vata oqori sa rogo mai kina na domodra e dua na ilala levu. Raica! Era tauri iseleiwau kei na iwau! Era tauri cina tale tu ga. Nira sa voleka yani, e lai reguci Jisu sara e dua vei ira me vaka ga o raica toka oqori. Oya sara ga o Jutasa Isikarioti! Na cava e reguci Jisu kina?

E taroga o Jisu: ‘I Jutasa o sa vakatakilai au ena iregu?’ Io, na iregu oya e ivakatakilakila. Mera kila kina o ira na lako vata yani kei Jutasa ni oya o Jisu, na tamata sara ga era vinakata. Era mani vesuki Jisu sara na meca. Ia ena sega ni soli Jisu vakarawarawa o Pita. E ucuna mai na nona iseleiwau qai taya na tamata e duri voleka tu vua. E calata ga na uluna qai taya laivi na daligana imatau. E qai vakabula na tamata oya o Jisu ni tara na daligana.

Sa qai kaya o Jisu vei Pita: ‘Daramaka na iseleiwau ina kena taga. O sega beka ni kila ni rawa meu kerea vei Tamaqu e udolu vakaudolu na agilosi mera vakabulai au?’ Io, e rawa ni cakava o koya na ka oqori! Ia e sega ga ni kerea na Kalou o Jisu me tala yani na agilosi, ni kila ni sa kena gauna oya mera kauti koya kina na meca. E soli koya vakarawarawa vei ira. Meda raica mada se cava e sa na yaco vei Jisu.