Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 iTalanoa 90

O Jisu kei na Dua na Yalewa ena Yasa ni Toevu

O Jisu kei na Dua na Yalewa ena Yasa ni Toevu

A VAKACEGU toka o Jisu ena yasa ni dua na toevu mai Samaria. Era se lai voli kakana na tisaipeli. Na yalewa e vosa tiko kina o Jisu e mai takiwai qai kaya vua: ‘Solia mada mai vei au na wai meu gunu.’

E kurabui kina vakalevu na yalewa oqo. O kila na vuna? Ni o Jisu e Jiu, ia o yalewa e marama ni Samaria. Levu na Jiu era dau sevaki ira na kai Samaria. Era sega mada ga ni dau veivosaki! Ia o Jisu e lomani ira na veimataqali tamata kece. Sa qai kaya o Jisu: ‘Ke o kilai koya e kere wai tiko vei iko, o na kerea vua me solia vei iko na wai ni bula.’

Sa qai kaya na yalewa: ‘E titobu saka na toevu qai sega tu mada ga na nomuni vokete. E vei mo ni lai kauta mai kina na wai ni bula?’

Sa qai vakamacalataka o Jisu: ‘Ke o gunu mai na toevu oqo o na karamaca tale. Ia na wai au na solia ena rawa ni bula tawamudu o koya e gunuva.’

E kaya na yalewa vua: ‘Mo ni solia saka mai vei au na wai oqori! Meu kua tale ni qai karamaca. Meu kua tale ga ni qai mai taki wai tiko e ke.’

E nanuma na yalewa oqo ni wai dina e kaya tiko oya o Jisu. Ia a vakaibalebaletaka tiko o koya na itukutuku dina me baleta na Kalou kei na nona matanitu. Na itukutuku dina oqo e vaka na wai me bula kina e dua. Ena rawati kina na bula tawamudu.

Sa qai kaya o Jisu vua na yalewa: ‘Lai kaciva mai na watimu, mo drau lako vata mai.’

E sauma yani na yalewa: ‘E sega tu na watiqu.’

Sa qai kaya o Jisu: ‘O sa vosa dina. Sa lima oti na watimu, ia e sega ni watimu na tagane drau tiko vata ena gauna oqo.’

E kurabui na yalewa ni dina kece na ka oqo. E kila mada vakacava o Jisu? E kila, baleta ni o koya na iTalai Yalataki ni Kalou qai soli tale ga vua na itukutuku oqo. Nira sa lesu mai na tisaipeli, era kidacalataka ni veivosaki tiko o Jisu kei na yalewa ni Samaria.

Na cava eda vulica mai na veika oqo? E vakaraitaka ni o Jisu e lomana na tamata kece ga. Meda vakatotomuri koya. Meda kua ni nanuma nira ca e so baleta nida sega ni kaivata. O Jisu e vinakata mera kila na tamata kece ga na ka dina e basika ina bula tawamudu. O keda tale ga meda vukea e so tale mera kila na dina.