Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 81

Nuitaka na Veivuke ni Kalou

Nuitaka na Veivuke ni Kalou

VICA vata na udolu na Isireli era biubiu mai Papiloni ena ilakolako balavu i Jerusalemi. Nira yaco yani, sa vo ga na irusarusa ni koro qai lala tu. E vinakati mera tara vou tale.

Era tara sara ga e liu na icabocabo ni soro me vakacabori kina na isoro manumanu se isolisoli vei Jiova. Ena vica na vula tale emuri era tekivu tara kina na valenisoro. Ia era sega ni vinakata na meca era tu voleka. Era saga mera vakarerei ira na Isireli me rawa ni mudu kina na cakacaka. Kena itinitini era lai tukuna vua na tui vou ni Perisia me buli e dua na lawa me tarovi kina na cakacaka.

Sa 17 oqo na yabaki nodra lesu mai Papiloni na Isireli. E talai rau yani na nona parofita o Akeai kei Sakaraia o Jiova me rau tukuna vei ira na tamata mera tosoya tale na cakacaka. Era nuitaka na veivuke ni Kalou ra qai talairawarawa vei rau na parofita. Ra tekivu tara tale na valenisoro, dina ga ni vakatabui.

Sa qai lako mai e dua na vakailesilesi ni matanitu o Perisia, o Tatinai, qai tarogi ira na Isireli se dodonu cava e tiko vei ira mera tara kina na valenisoro. Era qai kaya vua na Isireli ni a se tukuna sara tu mai o Tui Sairusi ena gauna era a tiko kina mai Papiloni: ‘Dou lai tara na valenisoro i Jiova na nomudou Kalou i Jerusalemi.’

A vakauta sara yani o Tatinai e dua na ivola i Papiloni me taroga kina se a kaya dina na vosa oqori o Sairusi. Sega ni dede sa sauma mai na ivola na tui vou kei Perisia. E kaya mai kina ni vosa dina i Sairusi oya. Sa qai vola lesu mai na tui: ‘Laivi ira na Isireli mera tara na vale ni nodra Kalou. Au vakarota yani mo dou vukei ira.’ A vakacavari na tara ni valenisoro ni rauta e va na yabaki ra qai marau kina vakalevu na Isireli.

Sa voleka ni 48 na yabaki na kena tara oti na valenisoro. Era dravudravua tu ga na tamata e Jerusalemi qai sega ni rairai vinaka na koro kei na valenisoro ni Kalou. Ni se tiko ga mai Papiloni o Esera sa kila ni vinakati me vakavinakataki na valenisoro ni Kalou. O kila na ka a qai cakava?

A lai raici Atakisekise na tui Perisia o Esera, mani solia vua na tui vinaka oqo e levu na iloloma me kauta lesu i Jerusalemi. A mani kerei ira na Isireli era tiko mai Papiloni o Esera mera vukei koya ena kena kau na iloloma i Jerusalemi. Era kaya e rauta ni 6,000 na Isireli nira na lako. Era na kauta e levu na siliva, koula, kei na iyau talei.

A leqataki ira na tamata ca era tu ena gaunisala o Esera baleta ni na rawa ni butakoci na nodra siliva kei na koula ra qai vakamatei. Sa qai kacivi ira vata mai na tamata o Esera me vaka o rawa ni raica tiko qori, mera masuti Jiova me taqomaki ira ena nodra ilakolako balavu i Jerusalemi.

Io e qai taqomaki ira dina o Jiova. Era yaco bula i Jerusalemi ni oti e va na vula. E vakadinadinataka oqo ni o Jiova ena taqomaki ira dina era kere veivuke vua.