Raica sara na lewena

Raica na lewenivola

 iTalanoa 80

Biuti Papiloni na Tamata ni Kalou

Biuti Papiloni na Tamata ni Kalou

SA VIA yabaki rua toka na nodra a vakavuai Papiloni na mataivalu ni Mitia kei Perisia. Ia raica mada na ka sa yaco tiko oqo! Era sa biuti Papiloni na Isireli. Era a sereki vakacava? O cei e sereki ira?

A sereki ira o Sairusi na tui Perisia. Ni se bera sara ni sucu o Sairusi, sa tukuna makawa tu mai o Jiova vei Aisea, na nona parofita, me vola na veika baleti koya: ‘O na vakayacora na veika au vinakata mo cakava. Ena dolavi tu na matamata vei iko mo vakavua na koro.’ A liutaka dina o Sairusi na kena kabai o Papiloni. Era curuma yani na koro ena bogi na kai Mitia kei Perisia ni dola tu na kena matamata.

Ia a kaya o Aisea na parofita i Jiova ni na vakarota tale ga o Sairusi me tara tale o Jerusalemi kei na kena valenisoro. E dina beka oya? Io. E kaya vaka oqo o Sairusi vei ira na Isireli: ‘Dou lako, mo dou lai tara na vale i Jiova na nomudou Kalou i Jerusalemi.’ Oqo sara ga na ka era na lai cakava na Isireli.

Era sega ni rawata kece na Isireli na ilakolako balavu oqo i Jerusalemi ni rauta tiko e 800 na kilomita na kena yawa. E levu era sa qase ra qai malumalumu. E so e tiko tale na vuna era sega ni lako kina. Ia e kaya o Sairusi vei ira era sega ni lako: ‘Dou solia na siliva kei na koula kei na isolisoli vei ira era lesu mera taravaki Jerusalemi tale kei na kena valenisoro.’

E levu sara na isolisoli e soli vei ira na Isireli era sa lako tiko i Jerusalemi. O Sairusi tale ga e solia vei ira na bilo kei na dari a kauta mai o Tui Nepukanesa mai na valenisoro i Jiova ena gauna a vakarusai Jerusalemi kina. E levu sara na ka mera kauta lesu na Isireli.

Era yaco donu yani i Jerusalemi na Isireli ni oti e rauta ni va na vula. E 70 taucoko na yabaki na kena a vakarusai na koro levu oqo, qai sega tale ni dua e vakatawana. Dina nira sa lesu tale ina nodra vanua na Isireli, era na sotava ena so na gauna na bula dredre me vaka eda na qai raica.