Raica sara na lewena

Raica na lewenivola

 ITALANOA 83

Na Bai kei Jerusalemi

Na Bai kei Jerusalemi

RAICA mada na cakacaka e caka tiko oqo. Era ogaoga na Isireli ena tara ni bai kei Jerusalemi. Na gauna a vakarusai Jerusalemi kina o Tui Nepukanesa ena 152 na yabaki sa oti, a vakarusa tale ga na bai qai vakama na matamata ni koro. Era a sega ni vakaduria tale na bai na Isireli ena nodra lesu mai Papiloni.

Era nuidei beka na tamata ena nodra sa mai tiko ena vica vata na yabaki ena dua na koro e sega tu na kena bai? Sega, era sega ni nuidei. Ni rawarawa sara ga na nodra mai valuti vei ira na meca. Ia e mai vukei ira tiko o Niemaia mera vakaduria tale na bai. O kila se o cei o Niemaia?

O koya e dua na turaga ni Isireli e lako mai na koro levu o Susani, na vanua tale ga e rau tiko kina o Moatekai kei Esiteri. E cakacaka tiko ena vale ni tui, qai rairai itokani vinaka i Moatekai kei Esiteri na Ranadi. E sega ni kaya na iVolatabu ni cakacaka o Niemaia vei tui Easuerosi na wati Esiteri. Ia e cakacaka ga vua na tui e tarava, o Tui Atakisekise.

Nanuma tiko e tui vinaka o Atakisekise ni a solia na ilavo vei Esera me lai vakavinakataki kina na valenisoro i Jiova mai Jerusalemi. Ia a sega ni tara na bainikoro o Esera. Meda raica mada se a mai cakava vakacava na cakacaka oqo o Niemaia?

Sa oti mai oqo e 13 na yabaki nona a solia o Atakisekise vei Esera na ilavo me vakavinakataki kina na valenisoro. E liutaki ira sara tiko ga na dau talo waini mei tui Atakisekise o Niemaia. Kena ibalebale oqo ni na raica tiko me kua ni vagagai na mena gunu na tui. E dua dina na itavi bibi.

Ena dua na siga a mai sikovi Niemaia na tacina o Anani kei ira tale e so na turaga mai na vanua o Isireli. Eratou mai tukuna vua na leqa era sotava tiko kei na kena se sega tu ga ni vakaduri na bai kei Jerusalemi. E rarawa kina vakalevu o Niemaia qai masulaka vei Jiova na leqa oya.

Ena dua na siga a raica votu na tui na rarawa i Niemaia, mani taroga: ‘Na cava o rarawa tiko kina?’ A kaya vua o Niemaia ni vu tiko mai na ituvaki ca e tu kina o Jerusalemi kei na kena bai. E taroga tale na tui: ‘Ia na cava o vinakata?’

E kaya yani o Niemaia: ‘Ni soli au mada meu lai vakaduria na bai kei Jerusalemi.’ E tui yalovinaka o Atakisekise qai vakadonuya nona kerekere, mani solia tale ga e so na kau me lai vakayagataki ena tara ni bai. Ni yaco yani i Jerusalemi o Niemaia sa tukuna sara vei ira na veika e sa nanuma tu me mai cakava. Era taleitaka dina ra qai kaya: ‘Meda sa tekivu tarataravaki sara.’

Nira raica na meca ni sa tekivu na cakacaka, era kaya: ‘Keimami na vakamatei ira me tarovi kina na nodra cakacaka.’ E rogoca rawa o Niemaia qai solia yani vei ira na cakacaka tiko na moto kei na iseleiwau. E kaya vei ira: ‘Kua ni rerevaki ira na meca. Dou vala ena vukudra na tacimudou, na watimudou, na luvemudou, kei na nomudou vale.’

Era yaloqaqa na tamata. Era vakarautaka tu nodra iyaragi ena siga kei na bogi qai toso tiko ga na tarataravaki. Ena loma ga ni 52 na siga sa duri oti na bai. Era sa qai mai tiko vakacegu yani na lewenivanua ena koro. Era marautaka tale ga na nodrau veivakavulici mai na lawa ni Kalou o Niemaia kei Esera.

Ia e sega ni tautauvata sara na kedra ituvaki me vaka nodra a se bera ni kau vakavesu i Papiloni. Ni se liutaki ira tiko ga na tui Perisia qai dodonu tale ga mera qaravi koya. Ia a sa yalataka oti tu o Jiova ni na tala mai e dua na tui vou ena kauta mai na bula vinaka vei ira na lewenivanua. O cei na tui oqo? Ena kauta mai vakacava na bula vinaka i vuravura? E sega ni vulici tale e dua na ka me baleti koya me yacova ni oti e 450 na yabaki. Sa qai mai sucu yani e dua na gone. Oqori eda na qai raica tarava.