Raica sara na lewena

Raica na lewenivola

 ITALANOA 56

Saula—iMatai ni Tui Isireli

Saula—iMatai ni Tui Isireli

RAICI Samuela mada ni livia tiko na waiwai ina ulu ni turaga oqo. Oqo a dau caka ena gauna makawa me kilai kina ni sa digitaki e dua me tui. O Jiova sara ga a tukuna vei Samuela me livia ena ulu i Saula na waiwai. Oqo e waiwai digitaki, e boi vinaka.

E nanuma o Saula ni sega ni ganiti koya me tui. E kaya vei Samuela: ‘Au lewe ga ni dua na yavusa lailai e Isireli, o Penijamini. Na cava o kaya kina niu na tui?’ A vinakati Saula o Jiova baleta ni sega ni dau vakalevulevui koya. Oqori na vuna e digitaki koya kina me tui.

Ia e sega ni dravudravua se tamata lailai o Saula. E lako mai na vuvale vutuniyau. E tagane balavu qai rairai totoka. Na kena balavu e sivi ira kece na Isireli ena rauta ni 30 na sedimita. E kaukaua qai dau cici totolo. Era marau dina na lewenivanua ni digitaki Saula o Jiova me tui. Era kailavaka kece: ‘Me bula balavu na tui!’

Era kaukaua cake tiko ga mai na meca ni Isireli, ra qai dau vakatubuleqa. Ni oti ga nona buli o Saula me tui, era sa mai valuti Isireli sara na kai Amoni. E vakasoqoni ira vata e dua na mataivalu levu o Saula, ra qai qaqa vei ira na kai Amoni. E vakamarautaki ira gona na tamata ni mai tui o Saula.

E vica vata tale na yabaki nona liutaki ira tiko ena qaqa vei ira na meca o Saula. E tiko tale ga na luve i Saula tagane yaloqaqa o Jonacani. E dau veivuke vakalevu ena nodra valuti e levu na meca. Era meca levu ni Isireli na kai Filisitia. Dua na siga era lako mai e udolu vakaudolu mera vala kei Isireli.

E kaya o Samuela vei Saula me waraki koya me qai mai vakacabora na isoro vei Jiova. Ia ni bera tiko mai o Samuela, a taqaya o Saula de ra na tekivu vala mai na kai Filisitia. E lai vakacabora sara kina vakataki koya na isoro. Ni lesu mai o Samuela e kaya vei Saula ni sa rui talaidredre. ‘Ena digia tale e dua o Jiova me tui Isireli.’

E baci talaidredre tale o Saula. Sa qai kaya vua o Samuela: ‘E vinaka cake na vakarorogo vei Jiova mai na solia vua na sipi vinaka. Ni o sa sega ni vakarorogo vei Jiova, o na sega ni tui tale tiko e Isireli.’

E dua na lesoni vinaka eda vulica e ke. E vakaraitaka na bibi ni dau talairawarawa vei Jiova. E vakaraitaka tale ga ni rawa ni vuki na tamata vinaka me vakataki Saula me ca. Eda sega sara ga ni via cakava na ka oqori, se vakaevei?