Raica sara na lewena

Raica na lewenivola

 ITALANOA 62

Tubu na Leqa ena Vale i Tevita

Tubu na Leqa ena Vale i Tevita

NI SA veiliutaki o Tevita e Jerusalemi, a dau tokona o Jiova nona mataivalu mera qaqa. A yalataka oti tu mai o Jiova ni na solia na vanua o Kenani vei ira na Isireli. Ni vukei ira gona o Jiova era sa mai taukena tu kina na vanua taucoko a yalataki vei ira.

O Tevita e dua na iliuliu vinaka qai dau lomani Jiova. Ni valuti Jerusalemi oti e lai kauta sara ga mai na kato ni veiyalayalati i Jiova, qai vinakata me tara e dua na kena vale.

Ni sa qase mai o Tevita, a cakava e dua na cala levu. E kila vinaka tu o koya ni cala meda taura na veika e nodra na tani. Ia, dua na yakavi ni a vakararai toka mai na nona dela ni vale vakatui, a raica sara e dua na yalewa rairai totoka. Na yacana o Pacisepa. E wati Uraia, na sotia i Tevita.

Dua na ka nona domoni Pacisepa o Tevita, qai lai kauti koya mai ina nona vale. O wati Pacisepa e tu ena vanua ni valu. Erau tiko vata vakaveiwatini o Tevita kei Pacisepa, sega ni dede sa bukete o Pacisepa. Dua na ka nona lomaleqa o Tevita, mani vakauitukutuku kina vei Joapi na nona turaganivalu me biuti Uraia sara ga i liu me rawa ni mate kina. Ni sa mate o Uraia a qai vakamautaki Pacisepa o Tevita.

E cudruvi Tevita vakalevu o Jiova. Sa qai talai Necani yani me vakaraitaka vua na nona cala. O rawa ni raici Necani ni vosa tiko oqori vei Tevita. E veivutunitaka sara ga o Tevita na veika ca a cakava. Oya na vuna e sega ni vakamatei koya kina o Jiova. E kaya ga vua: ‘Ena vuku ni veika o cakava, ena levu kina na leqa ena nomu vale.’ Na tama ni leqa levu!

Kena imatai nona mate na luve i Pacisepa. Oti oya, o Aminoni na ulumatua i Tevita e vakaukauataki Tema na ganena me rau moce vata. E cudru sara kina vakalevu o Apisalomi, e dua tale na luve i Tevita, qai vakamatei Aminoni. Lakolako, sa qai buli o Apisalomi me tui, ni levu na tamata era tokoni koya. A qai mate o Apisalomi ena dua na ivalu e a vala tale tiko ga kina o Tevita. Io e sa rui levu dina na leqa i Tevita.

Ni yaco tiko oqori, a vakasucuma o Pacisepa e dua tale na luvedrau tagane, na yacana o Solomoni. Ni sa qase o Tevita qai malumalumu a saga na luvena o Atonaija me tui. Ia e kaya o Tevita vei Setoki na bete me lumuti Solomoni me vakaraitaka ni o koya ena tui. Sega ni dede sa mate o Tevita ni sa 70 na yabaki ni nona bula. A 40 taucoko na yabaki ni nona veiliutaki, ia oqo sa mai tui e Isireli o Solomoni.