Raica sara na lewena

Raica na lewenivola

 ITALANOA 58

Tevita kei Kolaiaci

Tevita kei Kolaiaci

ERA se baci vala tale kei Isireli na kai Filisitia. E tolu na tuaka i Tevita eratou sa lewe ni mataivalu i Saula. Ena dua gona na siga a kaya o Jese vei Tevita: ‘Kauta mada e so na madrai mo lai raici iratou na tuakamu se ratou sa vakacava tiko.’

Ni yaco yani ena keba ni valu o Tevita e cici sara ina vanua ni vala me lai vaqarai iratou na tuakana. Ena gauna vata oqori e basika mai kina na tuwawa ni Filisitia o Kolaiaci me baci vakalialiai ira na Isireli. Ena veimataka kei na yakavi ni 40 na siga sa oti e dau kailavaka tiko: ‘Dou digia mai e dua me keirau mai vala. Ke qaqa me vakamatei au, keimami qai nomuni bobula. Ke noqu na qaqa, au na vakamatei koya. Oni qai neimami bobula. Dou digia mai e dua me keirau vala.’

A mani taroga e so na sotia o Tevita: ‘Na cava ena soli vua na tamata e vakamatea na kai Filisitia oqo, me sereki Isireli mai na veivakamaduataki?’

E kaya e dua na sotia: ‘Ena solia vua o Saula e levu na iyau kei na luvena yalewa me watina.’

Ia era rerevaki Kolaiaci kece na Isireli ni sa rui tamata levu. E rauta ni 3 na mita na kena balavu qai tiko ga na sotia me colata na nona isasabai.

Era lai tukuna vei Tui Saula e so na sotia ni via vala kei Kolaiaci o Tevita, qai kaya vua o Saula: ‘O na sega ni rawati koya. O sa rui gone, e se sotia tu mai vakabalavu o koya.’ E sauma o Tevita: ‘Au sa vakamatea oti e dua na pera kei na dua na laione a kauta na sipi nei tamaqu. Ena yaco tale ga vaka kina vei koya na kai Filisitia oqo. Ena vukei au o Jiova.’ Sa qai kaya o Saula: ‘Mo lako, me tikovata kei iko o Jiova.’

E lako sobu sara yani ina uciwai o Tevita. E tomika mai kina e lima na vatu yagoyagovinaka, qai tawana ina nona taga. Sa qai kauta na nona irabo me lai sota kei na tuwawa. E sega sara ga ni vakabauta o Kolaiaci ni sa raici koya. E nanuma ni na rawarawa vua me vakamatei Tevita.

E kaya o Kolaiaci: ‘Lako mai vei au, au na solia na yagomu vei ira na manumanu me kedra.’ Ia e kaya o Tevita: ‘O lako mai vei au kei na moto, iseleiwau, kei na isasabai, au lako yani vei iko ena yaca i Jiova. Ena siga oqo sa soli iko tu o Jiova ina ligaqu meu vakamatei iko.’

E cicivi Kolaiaci yani o Tevita, taura mai e dua na vatu, biuta ena nona irabo qai rabotaka ena nona igu taucoko. E cawi yani vakadodonu na vatu qai lauta vinaka na yadre i Kolaiaci, e bale i ra mani mate sara kina! Era dro na kai Filisitia nira raica sa mate na nodra toanivala. Ra cici muri ira yani na kai Filisitia na Isireli, mani nodra kina na qaqa.