Raica sara na lewena

Raica na lewenivola

 ITALANOA 60

O Apikali kei Tevita

O Apikali kei Tevita

O CEI beka na yalewa totoka e lako tiko mai oqori vei Tevita? Na yacana o Apikali. E yalewa yalomatua qai tarovi Tevita mai na nona cakava e dua na ka ca. Ia ni bera noda vulica oqori, da raica mada na veika e sotava tiko o Tevita.

A vuni tiko ena dua na qara o Tevita ni oti nona dro mai vei Saula. Eratou lai tiko kei koya e kea o iratou na tacina kei na vo ni nona vuvale. E rauta ni 400 na tagane era muri koya yani mani yaco kina o koya me nodra iliuliu. Sa qai lako yani vei tui Moapi o Tevita qai kaya: ‘Mo yalovinaka me rau tiko mada e ke na noqu itubutubu. Me macala mada na ka ena qai yaco vei au.’ Sa qai lai vuni voli ena veidelana o Tevita kei ira na nona tamata.

Oti, rau qai sota o Apikali kei Tevita. Na wati Apikali, o Nepali, e dua na turaga vutuniyau. E 3,000 na nona sipi, 1,000 na nona me. E tamata ca o koya. Ia e yalewa totoka o Apikali qai dau caka vinaka. A vakabulai iratou na nona vuvale ena dua na gauna. Meda raica mada se cakava vakacava.

E dau caka vinaka o Tevita kei ira nona tamata vei Nepali. Era dau taqomaka vinaka na nona sipi. O koya gona, dua na siga a tala yani o Tevita e so na nona tamata mera lai kerekere vei Nepali. Era lako sara ga yani ni se qai kotiva tiko na vuti ni sipi o Nepali kei ira na nona tamata. E nodra siga ni kana magiti qai levu sara tu ga na kakana. Era kaya na tamata i Tevita: ‘Keimami sa dau caka vinaka vei iko. Keimami sega ni butakoca e dua na nomu sipi. Ia yalovinaka solia mada e so na keimami.’

E sauma mai o Nepali: ‘Au sega ni kilai kemudou, au na sega tale ga ni solia na kakana vei kemudou.’ E vosa vakaviavialevu qai kaya e so na ka ca baleti Tevita. E vakacudrui Tevita vakalevu ni rogoca na kena itukutuku mani kaya kina vei ira nona ilala: ‘Dou kauta mai na nomudou iseleiwau.’ Era sa qai lako yani mera lai vakamatei Nepali kei ira nona tamata.

E mai tukuna vei Apikali e dua na tamata i Nepali na ka e rogoca. Sega ni wawa o Apikali ni vakavodoka e so na kakana ena nona asa me lako yani vei Tevita. Ni sa sotavi Tevita ga, e sobu mai na asa qai cuva. E kaya: ‘Mo ni yalovinaka sara, kua ni rogoci Nepali na watiqu. E rui yalowai, qai dau cakava na ka lialia. Oqo e dua na iloloma me nomuni. Kerea mo ni vosota na veika a yaco.’

E sauma o Tevita: ‘Oni sa yalewa yalomatua dina. E rui tamata ivakarau ca na watimu, ia ena vukumuni ga au na sega ni vakamatei koya. Mo lesu ena vakacegu.’ Emuri ni sa mate o Nepali, a qai mai wati Tevita o Apikali.