Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 59

Na Vuna e Dro Kina o Tevita

Na Vuna e Dro Kina o Tevita

NI VAKAMATEI Kolaiaci oti o Tevita, sa qai kauti koya yani vei Saula na turaganivalu ni Isireli o Apineri. E marautaki Tevita vakalevu o Saula mani lesi koya me dua na turaganivalu ni nona mataivalu. E kauti koya tale ga me lai tiko ena vale ni tui.

Dua na gauna emuri nira lesu mai na valuti ira na kai Filisitia, era seretaka sara na yalewa: ‘Sa mokuta e lewe udolu o Saula, ia e tini na udolu o Tevita.’ Oqo e vakavuna me vuvu kina o Saula, ni sa dokai vakalevu o Tevita qai vakalailai ga o koya. Ia e sega ni bau vuvu na luve i Saula o Jonacani. Erau dau veilomani vakalevu kei Tevita. Erau sa qai veiyalayalati ni rau na veitokani tiko ga.

O Tevita e matai sara ena qiri api, qai dau taleitaka o Saula na ivakatagi e dau qiria. Ia dua na siga e cakava o Saula e dua na ivakarau torosobu. E vu tiko ga mai na nona vuvutaki Tevita. Ena gauna e qiri api tiko kina o Tevita, a qai taura mai na nona moto o Saula qai cokai koya yani. E kaya: ‘Au na cokai Tevita me coba ena lalaga!’ Ia e leve o Tevita qai calati koya. Dua tale na gauna emuri a calati Tevita tale ga na moto i Saula. Sa kila sara ga o koya me na qaqarauni.

O nanuma na yalayala i Saula ni na soli luvena yalewa me wati koya e vakamatei Kolaiaci? A qai tukuna tale vei Tevita ni na rawa ga ni vakawatitaki Maikali na luvena, ke vakamatei ira mada e liu e 100 na kai Filisitia. Vakasamataka mada oqori! E nuitaka o Saula nira na vakamatei Tevita na kai Filisitia, ia e dreve nona inaki. Sa qai soli luvena yalewa o Saula me wati Tevita.

Ena dua na siga sa kaya o Saula vei Jonacani kei ira kece na nona dauveiqaravi ni vinakata me na vakamatei Tevita. E mani kaya vei tamana o Jonacani: ‘Kua ni vakamavoataki koya, e sega ni cakava vei iko e dua na ka ca, e dau vukei iko ga. O a marautaka mada ga nona bole mate me vakamatei Kolaiaci.’

E rogoci luvena o Saula, qai yalataka ni na sega ni vakamatei Tevita. A lesu tale mai o Tevita me mai veiqaravi ena vale i Saula. Ena dua tale na siga ni vakatagi tiko o Tevita, se baci cokataka na nona moto o Saula. A leve ga o Tevita qai coba na moto i lalaga. Oqo sa ikatolu ni gauna! Sa kila sara ga e keri o Tevita ni dodonu me dro!

Ena bogi tiko ga oya, a lesu o Tevita i nona vale. Ia a talai ira yani e so na tagane o Saula mera vakamatei koya. Ni kila o Maikali na inaki i tamana sa qai kaya vei watina: ‘Ke o sega ni dro ena bogi nikua, o na mate.’ Ena bogi tiko ga oya a vukei Tevita sara me curu ina dua na katubaleka me dro kina. E rauta ni vitu na yabaki nona veidroyaki voli o Tevita mai vei Saula.