Raica sara na lewena

Raica na lewenivola

 ITALANOA 68

Vakabulai e Rua na Gonetagane

Vakabulai e Rua na Gonetagane

ENA tarai tinamu vakacava ke o vakabulai tale mai na mate? Sa na bau dua na ka na nona marau! Ia ena rawa beka ni bula tale e dua a sa mate? A sa bau yaco mada e liu?

Raici iratou mada na le tolu oqori. Na turaga o Ilaija na parofita, na yalewa e yada ni koro o Sarifaci kei na gone, na luvena tagane. A tauvimate bibi na gonetagane ena dua na siga mani mate sara. Sa qai kaya o Ilaija vua na yalewa: ‘Solia mai vei au na luvemu.’

A kauta na gone ina itabavale e cake o Ilaija qai vakadavori koya ena imocemoce. Oti sa qai masu: ‘I Jiova mo ni vakabula tale na gone oqo.’ Sa qai cegu tale na gone! A lai soli koya tale vei tinana o Ilaija qai kaya: ‘Raica, sa bula na luvemu!’ Oqori na vuna e marau tiko kina vakalevu o tinana.

Dua tale na parofita i Jiova o Ilaisa, o koya e dau veivuke vei Ilaija. Yaco na gauna me sa vakayagataki Ilaisa tale ga o Jiova me dau cakamana. Dua na siga a lako o Ilaisa ina koro o Sunemi. E tiko tale ga kina e dua na yalewa e dau ciqomi koya. Lakolako rau sa qai vakaluveni na yalewa oqo kei watina.

A lai vukei tamana sara ena were ena dua na gauna o gone ni sa qase mai. Vakasauri ga sa kaya: ‘E mosi na uluqu!’ A qai lai mate ni sa yaco i vale. E rarawa vakalevu o tinana! Sega tale ni qai wawa o tinana ni sa lai kauti Ilaisa sara ga mai.

E lako sara yani ina rumu ni gone sa mate tu o Ilaisa. E masu vei Jiova, qai davoca yani na yagona me vakatakatai koya. Sega ni dede sa katakata mai na yago ni gone, qai suru vakavitu. E marau sara vakalevu o tinana ni sa bula na luvena!

E levu era dau mate e veisiga. Oqo era rarawa kina vakalevu na wekadra kei ira na nodra itokani. E sega vei keda na kaukaua meda vakabulai ira tale mai na mate ia e rawa ga ni cakava oqori o Jiova. Eda na qai vulica vakamalua na nodra na vakabulai mai na lewe milioni.