Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 51

O Ruci kei Neomai

O Ruci kei Neomai

E DUA na ivola ena iVolatabu e vakayacani vei Ruci. Oqo na italanoa me baleta e dua na vuvale eratou bula ena gauna era veiliutaki tu kina e Isireli na dauveilewai. E sega ni Isireli o Ruci, e yalewa ni Moapi. Ia e lomani Jiova vakalevu baleta ni sa vulica ni Kalou dina. A dau tukuni Jiova vei Ruci e dua sa kena marama toka, o Neomai.

E marama ni Isireli o Neomai. Rau a toki vakaveiwatini kei rau na luvedrau tagane i Moapi ena gauna ni dausiga e Isireli. A qai mate na watina ena dua na siga. Erau vakawati yalewa ni Moapi ruarua na luvena tagane. Na yacadrau na vugona o Ruci kei Oripa. Rau a qai mate tale ga na luve i Neomai tagane ni oti toka e tini na yabaki. E rarawa vakalevu o Neomai kei rau na vugona. Na cava sa na qai cakava tu oqo o Neomai?

Dua na siga a nanuma o Neomai me lesu vei ira na wekana i Isireli. Erau vinakata o Ruci kei Oripa me ratou tiko vata ga, rau mani muri koya tu yani. Ni se sega ni yawa na vanua eratou lakova, sa kaya o Neomai vei rau na vugona: ‘Drau dui lesu tale vei tinamudrau.’

A reguci rau na goneyalewa o Neomai me sa vakamoce. Ratou mani veitagicaki vakalevu ni rau sa rui nanumi Neomai. Erau kaya: ‘Sega! Keirau na lako vata kei iko vei ira na kai nomu.’ A sauma o Neomai: ‘Mo drau lesu tale na luvequ. E vinaka cake mo drau tiko ena nomudrau vanua.’ Sa mai lesu yani o Oripa, ia e bese ga o Ruci.

E vuki vua o Neomai qai kaya: ‘Sa lesu o Oripa. Mo lako tale ga o iko.’ E sauma o Ruci: ‘Kua ni cike meu lako tale ga o yau! Daru na lako vata. Na vanua o lako kina, au na lako kina, na vanua o na tiko kina, au na tiko kina. O ira na kai nomu era na kai noqu, nomu Kalou ena noqu Kalou. Na vanua o mate kina, au na mate kina, au na bulu tale ga kina.’ Ni oti nona cavuta na vosa oqori, e sega tale ni qai kaya e dua na ka o Neomai.

Lakolako, rau qai yaco yani i Isireli na veivugoni. Sa tekivu cakacaka sara o Ruci ena iteitei, ni rau donuya na gauna e dau tamusuki kina na sila. E vakatara e dua na turaga, na yacana o Poasa, me kumuni sila mai na nona were o Ruci. O kila se o cei na tina i Poasa? Na yalewa ni Jeriko, o Reapi.

Dua na siga sa kaya o Poasa vei Ruci: ‘Au mai rogoca na nomu dau yalovinaka vei Neomai. Au kila tale ga na nomu biuti rau mai na tamamu, na tinamu kei na nomu vanua mo mai tiko vata kei ira ni sega sara tu ga ni veikilai. Me vakalougatataki iko o Jiova.’

A sauma o Ruci: ‘Oni sa caka vinaka saka vei au. E vakayaloqaqataki au na nomuni vosa.’ E taleitaki Ruci vakalevu o Poasa. Sega ni dede rau sa vakamau. E vakamarautaki Neomai dina na ka oqo! Ia a qai marau sara vakalevu ni sa sucu o Opeti na luvedrau ulumatua tagane o Poasa kei Ruci. E qai tuka i Tevita o Opeti. Eda na qai vulica tale vakamalua e levu na ka baleti koya.

Na ivola kei Ruci.