Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ITALANOA 46

Na Bai kei Jeriko

Na Bai kei Jeriko

NA CAVA e bale kina na bai kei Jeriko? E vaka ga ni lutuka e dua na gasaukuro levu. Ia ena gauna oya era a sega tu kina na gasaukuro kei na dakai. Oqo e dua tale na cakamana i Jiova. Meda raica mada se yaco vakacava.

Rogoca mada na ka e kaya o Jiova vei Josua: ‘Mo yavokita na koro kei ira na nomu tamata era dau vala. Ni yavoki ga vakadua ena veisiga. Me ono na siga taucoko nomuni cakava tiko oqori. Dou colata tale tiko ga na kato ni veiyalayalati. Me ratou liu tiko vei kemudou e vitu na bete eratou dau uvu davui.

‘Ia dou qai yavoki vakavitu ena ikavitu ni siga. Oti me uvuci sara vakabalavu na davui, ra qai kaila ena domodra taucoko na tamata ena vakacibivalu. Ena qai bale na bai!’

E cakava o Josua kei ira na tamata na ka e kaya o Jiova. Ra yavoki galugalu ga e veisiga. E rogo ga na davui kei na yavadra. E rairai vakarerei ira sara ga na kedra meca na tamata ni Kalou e Jeriko. O raica na wa damudamu ni lili toka ena dua na katubaleka? Oqori na katubaleka ena vale nei Reapi. Io, e cakava sara ga o koya na ka rau a tukuna vua na yamata. Ratou tiko kece e loma na nona vuvale.

Ena ikavitu ni siga nira yavoki oti vakavitu, era uvuca sara na davui ra qai kaila na tamata ni valu. E kasura na bai. Sa qai kaya o Josua: ‘Ni lai vakama na koro, qai vakamatei ira kece na tamata. Vakama na ka kece vakavo ga na siliva, koula, parasa, kei na kaukamea. Na veika oqori me kau ina valeniyau i Jiova.’

E kaya tale vei rau na yamata: ‘Drau lai kauti Reapi mai kei na nona vuvale.’ Eratou bula ga o Reapi kei na nona vuvale, ni rau a yalataka na yamata.