Raica sara na lewena

Raica na lewenivola

 ITALANOA 53

Yalayala i Jefica

Yalayala i Jefica

O YALATAKA beka e dua na ka qai dredre mo cakava? A cakava na ka oqori na tamata ena iyaloyalo oqo. E matararawa sara ga kina. Oqo o Jefica na dauveilewai yaloqaqa ni Isireli.

E bula o koya ena gauna era sa sega tale ni qai sokaloutaki Jiova tiko kina na Isireli. Era cakava tale tiko ga kina na veika ca. Sa qai vakatara o Jiova mera vakararawataki mai vei ira na kai Amoni. E vakavuna sara ga na nodra tagi vei Jiova na Isireli: ‘Keimami sa ivalavala ca vei kemuni. Yalovinaka ni vakabulai keimami!’

Era veivutunitaka na nodra ivalavala ca. Ra sa qai qaravi Jiova tale, mani vukei ira kina o koya.

Era digitaki Jefica na tamata me valuti ira na kai Amoni. E vinakata vakalevu o koya na veivuke i Jiova. Sa qai yalataka vei Jiova: ‘Kevaka oni solia meu qaqa vei ira na kai Amoni, au na solia me nomuni na imatai ni tamata e tavaki au mai niu sa lesu yani i vale ena qaqa.’

E rogoca o Jiova na yalayala i Jefica qai vukei koya me qaqa. Ni sa lesu yani i vale o Jefica, o kila se o cei na imatai ni tamata e mai tavaki koya? Na luvena yalewa e duabau ga. E tagicaka gona o Jefica: ‘Oilei!’ O sa kauta dina mai vei au na rarawa luvequ! Ia au sa yalayala oti vei Jiova, au na cakava ga.’

Ni sa kila na luve i Jefica na yalayala i tamana, a rarawataka tale ga. Sa na vinakati vua me biuti tamana kina kei ira na nona itokani. Ia sa na lai qaravi Jiova tiko ena valeniveitavaki mai Sailo me yacova ni mate. Sa qai kaya vei tamana: ‘Ni o sa yalayala oti tu vei Jiova, mo cakava sara.’

Sa qai lako i Sailo na luve i Jefica, me lai qaravi Jiova ena valeniveitavaki ena vo ni nona bula taucoko. Ena veiyabaki era dau lai sikovi koya vakava na yalewa ni Isireli mera dau lai marau vata. E goneyalewa taleitaki na luve i Jefica baleta ni dua na dauveiqaravi vinaka i Jiova.